Shillong, Naitung 03
Ka Joint Action Committee of Local People on Kynshi Hydro Power Project (JACLPKHPP) kaba hap ha West Khasi Hills bad South West Khasi Hills District, ha ka Sngi Palei ka 03 tarik u Naitung 2025, ki la leit ban ïakynduh ïa u Myntri ka tnat Bording u A.T Mondal ban pan jingpynshai haba ïadei bad ka Kynshi Hydro Project.
Ha ka jingïakren bad ki lad pathai khubor, na ka liang u Secretary ka JACLPKHPP, Bah Zandy Myrthong u la ong, ba ka committee ka la pan jingshai haba ïadei bad ka jingsoi MoU biang ka Sorkar bad ka Company M/S Athena Pvt Ltd ka Company, kaba la shah pynduh ban pyntrei ïa ka Kynshi hydro Power Project.
Shuh shuh u la ong, ba ka sorkar ka la soi biang ïa ka MoU bad ka Company M/S Anthena Pvt Ltd, namar kane ka kompani ka la kyrpad biang ïa ka sorkar ban wanrah da ki buit stad sañan kumno ban ïoh khambun ka bording wat la ka um ka rit, bad dei lyngba jong kane ka sorkar ka la ïa soi biang ïa ka MoU bad kane ka kompani.
Ka kynhun ka dawa na ka sorkar ba ka dei ban khot lang ïa ka Joint Action Committee of Local People on Kynshi Hydro Power Project, ki trai khyndew, ki briew jong ka kompani ban ïakren sani bha ha shwa ban sdang ïa kane ka kam khnang ba kan ym don kano-kano ka jingpynwit haba ïadei bad kane ka kam.
Ka sorkar kam shym la shim jingmut bad ngi ban pyntrei ïa kane ka kam, kumta ngi wan khnang mynta ka sngi ban ïakren halor kane ka kam.
U Bah Zandy u la ong ba na ka liang u Myntri u la kular ban khot lang ïa ka Joint Action Committee bad ki trai khyndew ha shwa ban sdang pyntrei ïa kane ka Kynshi Project.
