Khliehriat, Naitung 03
U Kerlang Tlang na Jaiñtia Hills u la lah ban pyndep ïa ka eksamin jong ka Coaching Football Asian Football Confederation-C License kaba la pynlong ha u Jylliew ha ka nongbah Guwahati.
Une samla u dei na ka shnong Dkhiah West, East Jaiñtia Hills, u dei uba la mihkhmat ïa kiba bun tylli ki klob ha ka kyrdan ïalehkai Super Division ba la pynlong da ka East Jaiñtia Hills District Football Association.
Katto-katne ki klob kiba u la mihkhmat ki long ka Dkhiah West SC, Jalaphet Brisumer SC, Khliehriat West FC bad ka Rymbai Wah Shnong FC.
Ha u snem 2024 u la mihkhmat ïa ka Diengshynrum SC kaba dei ruh ka klob kaba la kiew kyrdan sha ka Super Division hadien ba ka la long kum lahduh ha ka First Division 2024.
Kumta na ka liang ka East Jaiñtia Hills District Football Association (EJHDFA) ka ai kitbok-kitrwiang ïa une u rangïalehkai barim ba un nangkiew ha ka kam ban ai jinghikai kum u coach bad ruh ba un long u nongbtin lynti ïa kiwei ki samla ka rilum Jaiñtia kiba don ka sap ka phong ïalehkai.
