Shillong, Naitung 03
Ka Meghalaya Poultry Farmers and Welfare Association (MPF&WA), ka la pynpaw ïa ka jingsngewkhia kaba jur halor ka jingwanrah u ophisar veterinary na ka shlem treikam jong ka Byrnihat Veterinary, uba la soi biang ïa ki syrnod kiba la pynmih da ka Block Veterinary Officer ka Jylla Assam, kiba ai lad ban wanrah ïa ki syiar shapoh ka Jylla Meghalaya khlem da leh ïa ka jingpeit bniah bad ka jingpyrkhing ïa ki jingpang.
Ka kynhun ka la ïakynduh bad u Secretary ka tnat Animal Husbandry and Veterinary, u Bah S.C. Sadhu, ban dawa da ka jingpynshitom mardor halor kane ka jingpynkheiñ kyndon ha kaba ïadei bad ka jingwanrah ïa ki syiar na Assam.
Haba kren sha ki lad pathai khubor ha ka Sngi Palei ka 03 tarik u Naitung 2025, uwei na ki dkhot jong ka seng, Bah William Diengdoh u la dawa ban pynsangeh noh shisyndon ïa ka jingwanrah ïa ki syiar shapoh ka Jylla, namar ka jingbym bud ïa ki kyndon aiñ kiba la buh.
U la ong ruh ba kane ka jingleh da u ophisar ka dei ka jingpynkheiñ ïa ka aiñ Livestock Transportation Rules 1978, bad ka long ka jingma ïa ki nongri syiar hapoh ka Jylla ha kaba ïadei bad ka jingbun ka jingsaphriang jong ka jingpang.
U Bah Diengdoh u la pynpaw biang ïa ka jingdawa ban pynsangeh noh mardor ïa ka jingwanrah syiar na Assam, da kaba kdew ba ki kyndon kiba la buh kim shym la ïasoh shuh.
U la bynrap ruh da kaba ong, ba ki dawa ruh ïa ka jingkheiñ kaba bniah ïa kane ka jingsoi biang ïa ki syrnod, ba ka dei ka jingpynlong da lade ne la don ba phah ne ai hukum na ki heh ophisar, bad dawa ba kiba donkti ha kane ka kam ki dei ban shah pynngat ha ka aiñ.
