Shillong, Naitung 03
U AT Mondal uba dei Myntri ba khmih ïa ka tnat C&RD u la ong ba ka jingpyntreikam ïa ka skhim Mahatma Gandhi National Rural Employment Guarantee Act (MGNREGA) hapoh Meghalaya ka long kaba ïaid beit bad kaba seisoh.
Ïa kane u Myntri u la jubab halor ka jingmih ki jingshah kynnoh ba ka don ka jingleh bym hok haba ïadei bad ka jingpyntreikam ïa ka MGNREGA khamtam ha ki thaiñ nongkyndong.
U AT Mondal u la ïathuh ba ka skhim MGNREGA ka dei ka skhim kaba heh tam hapoh ka Ri India namar ïa kane ka skhim la pyntrei ha baroh ki bynta jong ki Jylla jong ka Ri bad ong ba ka jingpyntreikam ïa ka Project MGNREGA ka kynthup lang ruh ïa ki tnat treikam Sorkar bapher-bapher katkum ki kyndon jong ka skhim.
Shuh shuh na ka liang jong u Myntri u la kubur ba kan don beit ka jingkynnoh ba don ka jingleh bym hok haba pyntreikam ïa ka skhim MGNREGA hynrei na ka liang ka Sorkar ka la shim da ki lad ki lynti ba tyngeh, lada ka ïohpdiang ïa ki jingujor na ki paidbah.
“Ngi la bthah ïa ki Block Development Officer ban pynthikna ba ka jingpyntreikam ïa ka skhim MGNREGA kan ïaid beit ïaid ryntih katkum ki kyndon ba la buh hynrei haduh mynta nga lah ban ong ba ka jingpyntreikam ïa kane ka skhim hapoh Meghalaya ka long kaba ïaid beit bad kaba jop,” la ong u Mondal.
