Guwahati, Naitung:
Ki pulit jong ka Assam ki la kem ïa 133 ngut ki briew ha ka sngi Ba-ar halor ka jingkynnoh ba ki la pynkheiñ ïa ka aiñ Assam Cattle Preservation Act, 2021.
Da palat palat shi ton ka doh kaba la suba ba ka dei ka doh masi la ïoh ban kurup ha ka jingkhynra kaba la pynlong ha kylleng ka jylla, ong u Inspector General of Police (Law and Order), u Akhilesh Kumar Singh. Kane ka jingpyntreikam kaba la sdang da ki pulit, ka dei kaba la thmu ban pyrshah ïa ka jingot beaiñ ïa ki masi bad ban die khlem jingbit ïa ka ha ki jaka bam.
Naba ka jingbam doh masi kam dei kaba be-aiñ ha Assam, ka Assam Cattle Preservation Act ka khang ban pynïap bad die ïa ka doh masi ha ki jaka ba bun paid ki Hindu, ki Jain, bad ki Sikh, bad kumjuh ruh hapoh ka jingjngai kaba 5 km na ki Temple ne ki Vaishnavite Monasteries (sattras).
