Ka jingjia kaba sngewtriem bad shyrkhei kaba la jia ha kawei ka jaka ïeng kali ha Pyndenumïong, Mairang ha ka janmiet jong ka Lah Sngi U Blei, ha kaba uwei samla u la ot da ka tari ïa la ka baieid ka la pynpur ‘ñiangkhriat ïa ka jaidbynriew hi baroh kawei haba pyrkhat halor kane ka jingjia. Ym tang ba ka dei ka jingjia kaba sngewtriem hynrei kaba la poi shaduh u pud ba la nud ban ot syndon hakhmat jong u kpa jong katei ka samla kaba duh noh shi syndon ïa la ka jingim.
Dang ha u bnai Jymmang kata ha ki kut taïew, ka Priya Khongstia ka la shah pynïap ha la u kurim ha ka ïing sah wai. Kum ka jylla bad ka ri baroh kawei ka la khihwin hadien ka jingshah pynïap jong uwei na ki nongjngoh kai na Indore, u Raja Raghuvanshi ha ka thaiñ Sohra. Imat na kane ka jingjia ha thaiñ Sohra, ka jingjia shah pynïap jong ka Priya Khongstia ruh kam shym la paw pyrthei mar-mar hadien ka jingjia.
Shano shuh kata ka pyrkhat pyrdaiñ ne ka jingtipbriew tipblei ka la jah. Ha ka jingshisha, lada kitei ki kynthei ki la leh ïa kano-kano kaba bakla, la dei ban kren pynbeit ne ban bishar ha kawei pat ka rukom bad ym ban shu shim noh syndet ïa ka jingim kaba kordor. Ngi tip ba ïa ka jaidbynriew jong ngi, la tip kum ka jaidbynriew tipbriew-tipblei hynrei kum kine ki jingjia shah pynïap dusmon jong ki ‘riewkynthei, ka la pynhiar kyrdan noh ïa ka jinglong kyrpang jong ka jaidbynriew, khamtam lei ka jaidbynriew kaba ai jait sha ka kmie. Kum kine ki jingjia jong ka jingpynïap dusmon ïa ki kynthei la ju ïohsngew sha kiwei pat ki bynta jong ka ri hynrei mynta imat kata ka jingtipbriew kam don shuh tharai haduh ba ym don jingsngew shuh wat tang khyndiat ruh ban shim im-im peit-peit ïa ka mynsiem briew. Kat nang ïaid ki por ki sngi, ki jingsniew kiba har rukom ki la nang jia hapoh ka jylla bad khamtam ha Rilum Khasi, kaba pyni ba ki briew kim salia shuh bad ki kham shlur pynban ban leh ïa kum kine ki kam sniew bad pyntriem pyrshah ïa ki kynthei.
Kiei ki daw jong ka jinglong shlur jong ki briew jong ngi mynta. Hato ka dei na ka jingjur bad kynrei palat jong u drok ne ka dei na ki kor ki bor teknologi lyngba ki mobile phone? Ngi sakhi ba ha kane ka juk kaba mynta, kiba bun ki briew naduh ki khynnah, ki samla haduh kiba la rangbah ki ju pynlut ïa ka por kaba bun tang ha ki mobile phone. Hooid lada pyndonkam ha ka rukom kaba dei, ka ïarap bad ai jingmyntoi ban tip ïa ki jingtip kylleng jong ka pyrthei hynrei lada pyndonkam ha ka rukom kaba bakla pat ka kloi bha ban ktah ïa ki jingmut jingpyrkhat khamtam lei jong ki khynnah bad samla, kaba ka bor pyrkhat ka dang duna. Kum ki kmie ki kpa, ki dei ban hikai bad pynsngewthuh ïa ki jingbha bad jingsniew bad ruh ban ïakren ne ïasyllok manla ka sngi bad la ki khun ki kti. Kum ki khun ruh kim dei ban burieh eiei hynrei ban ïathuh beit ha ki kmie ki kpa ïa kaei kaba ki don ha ka jingmut jingpyrkhat, namar kaba kun halade barabor ka lam sha ki jingsniew kiba har rukom.
Ka jingshongkha khynnah ruh ka dei kawei na ki daw kaba ju lam sha ki jingjia ki bym poi pyrkhat. Kum ki khynnah kiba dang lung ha ka bor pyrkhat pyrdaiñ, haba ki poi ïashongkha, ka eh shisha ba kin lah ban pynïaid ha ka rukom kaba beit ïa ka ïing ka sem bad hateng-hateng tang na i daw barit ka poi shaduh u pud ban sakhi ïa ki jingjia ki bym lah satia ban pyrkhat shuh.
