Shillong, Naitung 03
U P Yobin kum nongïasaid aiñ ka ïingbishar jong ka Meghalaya bad uba dei ruh u nongïasaid aiñ na ka bynta ka kynhun ki nongshong die madan kiba don hapoh ka synjuk jong ka Meghalaya and Greater Shillong Progressive Hawkers and Street Vendors Association (MGSPHSVA), u la pyntip ba ka ïingbishar ka la thung da u Ophisar ba kyrpang ban tohkit bniah halor ka jingthmu ban pynkynriah ïa ki nongdie madan na Khyndailad hadien ka dorkhas ba la mudui da ka Meghalaya Street Vendors and Hawkers Association.
Haba kren sha ki lad pathai khubor ha ka 3 tarik u bnai Naitung, 2025, u P Yobin u la ong ba ha katei ka dorkhas, na ka liang ka synjuk ka la shim ba ka jingthmu pynkynriah ïa ki nongshong die madan na Khyndailad sha ka jaka pynïeng kali jong ka Meghalaya Urban Development Authority (MUDA) ka long kaba pynkheiñ ïa ka hok jong ki bad ïa ka aiñ jong ki nongdie jingdie ha surok (Protection of Livelihood and Regulation of Street Vending) Act, 2014, katba na ka liang ka Sorkar pat ka la pynksan ba ka la pynbiang jaka na ka bynta ban pynkynriah ïa ki nongshong die madan.
U Yobin u la ong ba ka jingpyrshah jong ki nongshong die madan ban kynriah na Khyndailad ka dei namarba ki dawa ba ka jingpynkynriah ïa ki ka dei ban ïaid da ka lynti kaba khuid ba suba bad katkum ki kyndon aiñ ka Sorkar Pdeng kiba dei ki aiñ jong ki nongshong die jingdie madan.
“Ka synjuk ka la pynpaw ba namarba ka Sorkar ka khlem bud ryntih ïa ki kyndon aiñ, ka la wanrah shibun ki kynrum-kynram, ki jingud-jingnam bad ki jingbym sngewthuh bad kumta namar kata ki la kyrpad ban nym pynkynriah jaka ïa ki”, ong u Yobin.
U la ïathuh ba ha ka jingbishar, baroh ar ngut kata ki nongujor bad ka Sorkar ki la ai ïa ki jingkynthoh bad ki jingkynthoh pyrshah jong ki bad hadien ba la bishar bniah ïa ki jingai jingmut, ka ïingbishar ha ka 3 tarik u Naitung, 2025, ka la bthah ban thung ïa u Ophisar ba kyrpang, u Subhasis Chakrawarty ban pynlong ïa ka jingtohkit kaba bniah halor kane ka kam.
Shuh-shuh, u Yobin u la ïathuh ba ka ïingbishar ka la bthah ïa u Ophisar ban ai ïa ka kaiphod kaba bniah kaba batai ïa ka jinglong-jingman mynta, ka jingbit jong kiwei pat ki jaka ban pynkynriah, bad ka jingktah baroh kawei ïa ka jingim jong ki nongdie jingdie kiba shah ktah ha kane ka jingshah pynkynriah jaka bad ïa ka kaiphod yn sa bishar ha ka jingbishar kaba hadien kaba la buh ban long ha ka taïew ba nyngkong kata hashwa ka 5 tarik u bnai Nailar, 2025.
U la ong ba ka ïingbishar ka la hukum ba ki nongshong die madan ki bym pat ïoh ïa ka Certificate of Vending (COV) ki dei ban aplai noh bad na ka liang ki bor ba dei peit kin sa shim rai halor kata katkum ki kyndon ka aiñ.
Haba kylli kumno u sngew halor ka jingthmu pynkynriah ïa ki nongshong die madan na Khyndailad, u Yobin u la ong ba kaba donkam ka long ban peit bniah shwa ban pynkynriah ïa ki bad lada shem ba ka dei shisha kaba long be-aiñ kin sa lah ban pynkynriah ïa ki da kaba bynrap ba kat bym pat shai ka jingpynbeit, yn nym lah ban tip mano ba leh be-aiñ bad mano bym leh be-aiñ.
