Shillong, Naitung 03
Ka Borussia Dortmund ka la pynliem noh ïa ka Monterrey da 2-1 kol ha ka pre-quarter final jong ka Club World Cup, hynrei kane ka kynhun kaba na Germany kan duh noh ïa u Jobe Bellingham ha ka jingïalehkai quarter final pyrshah ïa ka Real Madrid kaba dei ka klob u hynmen jong u, u Jude.
U Jobe Bellingham u la ïohpdiang da ka yellow card ha ka jingïakhun jong ka kylla miet ha ka jingïalehkai pyrshah ïa ka Ulsan HD. Kumta une u rangïalehkai, 19 snem ka rta un duh noh ïa ka jingïakhun ka ban wan.
Ki kyndon ïalehkai jong ka Club World Cup ki batai shai ba ki ar tylli ki card rong step ha ki ar tylli ki jingïalehkai bapher-bapher ki pynlong ïa ka jingshah khang ïalehkai tang shisien ïalehkai, ha kaba ïa ki card rong stem la pynduh noh tang hadien ka jingïakhun kaba la dep.
“Nga sngew ma ngi bad baroh ngi la ïohi ba u Jobe Bellingham u la sngewsih haduh katta-katta,” ong u Manager ka Dortmund, u Niko Kovac.
“Nga tharai ba um shym la tip thikna ba ka yellow card ba ar ka dei ka jingshah pynsangeh ha ka por ba kut ka por. U la sngew lyngngoh khyndiat halor kane ka bynta.”
“Hooid u dang long uba dang khynnah. U hynmen jong u ruh u dang khynnah, kumta nga sngewskhem ba kin sa ïakynduh markylliang, lehse ha ka samoi ban wan ha ka Champions League bad nangta sa ha ka lawei ka ban wan. Ka lawei ka dei na ka bynta jong ki.”
“Ka Club World Cup kan long kaba biang eh, hynrei mynta kam long kumta. Uwei pat u dei ban ïalehkai na ka bynta jong u hynrei ka long ruh kaba biang.”
Ha katei ka jingïakhun pre-quarter final, ka Dortmund ka la jop da 2-1 pyrshah ïa ka Monterrey ban pynkhreh ïa ka jingïakhun pyrshah ïa ka Real Madrid, kaba la buh jaka ïalade sha ka quarter-final hadien ba ka la pynliem noh ïa ka Juventus.
U Serhou Guirassy u la thep ar kol na ka bynta ka Dortmund ha ka kylla step, hynrei u German Berterame u la lah ban pynphai kylla shi kol ha ka kylla miet.
Katei ka jingïalehkai quarter final kan long ha ka 6 tarik mynta u bnai.
