Shillong, Naitung 04
Ka Hynñiewtrep Youths’ Council (HYC) Sengkmie ha ka Sngi Thohdieng, ka 04 tarik u Naitung 2025, ka la leit ban ïakynduh ïa ka Director jong ka Animal Husbandry and Veterinary ka Dr. M. Kharshandi ban ïakren halor ka jinglap ïa kawei ka kali kaba kit palat pud haduh 9 tylli ki masi ha Byrnihat.
Ka seng ka la lap ïa kane ka kali kaba kit palat pud ïa ki masi dei ha ka 30 tarik u Jylliew 2025, ha Byrnihat kaba long beaiñ.
Haba ïakren bad ki la pathai khubor, u President ka HYC, Bah Roykupar Synrem, u la ïathuh ba ha katei ka sngi ka seng ka la thmu ban ap ïa ki briew kiba wan rung tuh sha ka Jylla, hynrei ka la lap pynban ïa kawei ka kali ba kit haduh 9 tylli ki masi bad kaba long beaiñ.
Ka seng ka la dep ban peit ruh ïa ki kot ki sla bad la lap ruh ba ki don haduh bun tylli ki masi ba la shu rah khlem da peitbniah ïa ka koit ka khiah jong kitei ki masi.
U Bah Roykupar u la ïathuh ba ka kali ha jingshisha ka dei ban kit tang kumba 2 tylli eiei ki masi, hynrei ka la shu kit palat pud ha kaba ki la don ruh ki masi ba la shu thiah lyngkthar ha madan namar ka jingkhapngiah palat ka kali.
Shuh shuh, u la ong ba ki kali kiba kit ïa ki mrad ki dei ban don ka jaka kaba biang ym ban shu thynñian ha kajuh kaba isaitmet ban peit, da kaba ong ba ki briew ba wanrah ïa ki mrad na kiwei ki Jylla ki dei ban rah ïa ka Transit Permit bad kumjuh ki dei ban rah ïa ka Syrnod na kato ka Jylla kaba ki wan ban pyni ba kine ki mrad, khamtam eh ki mrad ban shoh doh ki long kiba bit ban ot doh.
“Katkum ka Motor Vehicle Act 1988, kum ka Transportation of animal rule 1978 ka la kren shai, ba ki kali kiba rah ïa ki mrad ki dei ban ban long kiba don ïa ka jaka kaba biang, la ka dei ïa ki masi; ka mut ba uwei- pa-uwei u masi un dei ban don ka jaka kaba kylluid kumba 2 square metre eiei. Hynrei haba ngi peit ïa katei ka kali ha kato ka sngi ba ka seng ka la bat ka la isaitmet ban peit, namar ka kali ka dei ban kit tang kumba 2 tylli eiei ki masi hynrei la kit pat haduh 9 tylli,” la ong u Bah Roykupar.
U la ong kumba ka long mynta ka tnat Veterinary kam pat don ïa kino-kino ki kyndon ban pyntikna ba ki mrad ba wan sha ka Jylla jong ngi kin ïaid katkum ki kyndon jong ka aiñ.
Namar kata, ka seng ka la kyrpad na ka tnat Veterinary ban wad ïa ki jaka ha Ri-Bhoi ban buh ïa ki jaka peitbniah jong ka tnat ban peitbniah ïa ki mrad kiba thmu ban kit la ki long kiba biang ne em ban bam doh.
Ka seng kan dang ïai buddien halor kane ban pyntikna ba ka sorkar ka dei ban pynbiang ka jaka ba kine ki mrad kiba wan na kiwei ki jylla ki dei ban peitbniah bad ban buh ha ka jaka ba ka Veterinary kan ïoh ban peit ïa ki khnang ban tip ba ki mrad ba rung sha ka jylla ki long kiba biang ne em ban bam doh.
