Nongpoh, Naitung 04
U MLA jong ka Mawhati konstitwensi, Bah Charles Marngar ha ka Sngi Thohdieng u la leit ban jurip ïa ki lai tylli ki jaka ai jingsumar jong ka thaiñ ba kynthup ïa ka Mawlasnai PHC, ka Thadrang Health and Wellness Center bad ïa ka Tyrso Sub-Center kum shi bynta ban shem hi dalade ïa ki jingduna jong kine ki jaka ai jingsumar bad ki jingeh ba ki nongtrei ki ïa kynduh. Ha kane ka sngi, u Bah Charles u la lum jingïalang ruh ïa ki nongïalam shnong bad ki bor ka koit ka khiah ba ïa phylliew jingmut na ka bynta ban pynbha ïa ka rukom ai jingsumar sha ki paidbah.
Ha kane ka jingjurip la sakhi ruh da ka jingdon ryngkat jong ka Ayushi Prdhan, IAS na ka ophis jong u DC Ri Bhoi, ka Dr AR Marak, Additional District Medical and Health Officer (DMHO) ka Ri Bhoi District, u Bah Bokstar Syiem, Programme Manager ba dei khmih ïa ki lai tylli ki Block ka Ri Bhoi, ki nongïalam shnong lem bad kiwei de.
Haba kren sha ki lad pathai khubor hadien ka jingjurip ïa kitei ki lai tylli ki jaka ai jingsumar, u Bah Charles Marngar u la ong ba ka jingjurip mynta ka sngi kadei kaba khampher na ki jingjurip kiba u la pynlong ha ki por kiba lah dep kum u MDC.
U la ïathuh ruh ba hashwa jong kane ka jingjingjurip ruh, u lah dep tip lypa ïa ki katto katne ki jingeh ba kine ki jaka ai jingsumar ki ïa kynduh bad ha kane ka jingjurip, u la nang tip shuh shuh sa kiwei kiwei de ki jingeh bad ba na ka liang ka jong u, un ïaleh ban pynbiang ïa kine ki jingdonkam katba kiba u kotbor lyngba ka skhim MLA bad ïa kiwei pat ki bynta, u hap ban rah sha ka sorkar jylla ban pynurlong ïa kine ki jingdonkam naka bynta ka jingmyntoi jong ki paidbah nongshong shnong jong ka thain.
U Bah Charles Marngar u la pynpaw ruh ïa ka jingdonkam ban pynheh shuh shuh ïa ka Mawlasnai PHC namar ka jingnang roi jong ki paidbah nongshong shnong nalor ka jingdonkam ban don ïa ka kali kit nongpang bad kiwei kiwei de ki jingdonkam kiba na ka liang ka jong un sa shimkhïa bad ka sorkar jylla na ka bynta ban pynbit pynbiang ïa kitei ki jingduna bad ki jingdonkam khamtam kito kiba la long kyrkieh bad donkam eh hakhmat.
Na ka liang jong ki nongïalam shnong ba kynthup ïa u Bah B Sohtun President jong ka Synjuk ki Rangbah Shnong Border Area bad u Bah Aiboklang Saring, Rangbah Shnong ka Mawlasnai ki la pynpaw ïa ka jingsngewkmen ban ïadon bynta ha katei ka jingïalang kaba la lum la lang da u MLA ka thain, u Bah Charles Marngar ha ryngkat ka jingdon ki bor pynïaid District, ki bor ka koit ka khiah na ka bynta ban ïakren ïa ki mat kumno ban kyntiew bad pynbha shuh shuh ïa ka rukom ai jngsumar sha ki paidbah nongshong shnong.
Ki la pynpaw ruh ba kumba katei ka Mawlasnai PHC kadei kaba peit haduh 18 tylli ki shnong kiba hap ha katei ka thain khappud, la donkam kyrkieh ban pynheh shuh shuh ïa ka bad ruh khamtam ban pynbiang ïa ki doctor kiba lah ban ai ïa ka jingshakri kaba paka sha ki paidbah katei ka thaiñ.
