Shillong, Naitung 04
Ka Hynñiewtrep Integrated Territorial Organisation (HITO) ka la phah da ka shithi sha u Myntri ka Tnat ki kam pohïing jong ka Sorkar Pdeng, u Amit Shah ban kyntu ïa ka Sorkar Pdeng ban pyntreikam noh mardor ïa ka Inner Line Permit (ILP) hapoh ka jylla Meghalaya baroh kawei.
Ha u kyrwoh ba la phah da ka Seng lyngba u President, Bah Donbok Dkhar u la pynpaw ba ka jingpyntreikam ïa ka ILP kan pynkhlaiñ ïa ka jingpahara ha khappud da kaba peit pyrkhing ïa ka jingwanrung laitlan, ban ïada ïa ki Jaidbynriew trai ri bad ban pynneh ïa ka jinglong jingman jong ka jingbun briew, ban khmih bad khanglad ïa ka jingrung jong ki briew kiba nabar ka ri bad ki kynhun lehnoh (sleeper cells) bad ban pynkhlaiñ ïa ki jingpyrshang jong ka Ri pyrshah ïa ki kam lehnoh ba ïaid lyngba ki pud.
Ka Seng ka la ong ba ka jingdonkam ban pyntreikam ïa ka ILP ha Meghalaya kam dei shuh tang ka jingïada ïa ka kolshor hynrei mynta ka la long ka jingdonkam kaba kongsan na ka bynta ka jingmyntoi jong ka jingshngaiñ ka Ri.
“Ngi, namarkata, ngi kyrpad ïa ka ophis ba donburom jong phi ban pyrkhat kyrkieh bad pynsted ïa ka jingpyntreikam ïa ka ILP hapoh ka Meghalaya, da kaba ïamir jingmut bad ka Sorkar Jylla bad ki kynhun trai ri bapher-bapher jong ka Jylla”, ong ka Seng.
Ka HITO ka la ong ba ka jingïakynad kaba dang shen bad hadien kata ka jingsangeh thma hapdeng ka India bad ka Pakistan ha shilynter ka phang sepngi ka la pynpaw biang sa shisien ïa ka jingdonkam ban pynkhlaiñ ïa ka jingïada hapoh ka ri ha kylleng ki jaka khappud kiba shah ktah, kynthup ïa kito kiba don ha ka thaiñ shatei lammihngi.Ka Seng ka la pynpaw ka jingsngewkhia ruh halor ka jingïoh jingtip ha kaba ïadei bad ka jingwan rung kyrthep ki briew na khappud ka India bad ka Bangladesh, kynthup ïa ka Meghalaya, bad ka jingbuh ïa ka ktem ba kongsan jong ka ISI jong ka Pakistan ha Bangladesh, kaba buh jingma kaba khraw ïa ka jingïada ri.
Ka Seng ka la ong ba kane ka jinglong-jingman, ka jingkiew jong ki jingwan rung be-aiñ sha Meghalaya ba la kynnoh ba la pynsuk lyngba ki jingpynbor pisa, ka pynmih ïa ka jingsngewkhia kaba jur, da kaba bynrap ba kine ki kam kim dei tang ka jingpynkheiñ ïa ka jingsynshar jong ka ri India hynrei ka long ruh ka khyrdop kaba lah ban rung da ki kynhun lehnoh (sleeper cells) ne ki kam lehnoh kiba lah ban pynthut ïa ka imlang sahlang bad ka thaiñ.
Ka Seng ka la kdew ruh ïa ka jingdon ka jingkiew ka jingleh ïa ki kot ki sla kiba thok, kynthup ïa ki hajar tylli ki Aadhaar bad ki EPIC Card kiba thok kiba la pyndonkam da ki nongwan rung tuh ban ïoh ïa ki skhim jingïarap bad ban ïasoh bad ki nongshong shnong bad ong ba kane ka dei ka jingduna kaba khraw kaba donkam ban pynbeit mardor.
Da kaba pynpaw ruh ïa ka jingjia shah pynïap kaba dang shu dep jia shen ha Sohra, kaba la donkti da ki briew kiba na shabar ka thaiñ kata na Madhya Pradesh, ka pynpaw ïa ka jingdonkam ban don ki lad pynïaid kiba kham bha ban buddien bad pynïaid ïa ka jingwan rung jong ki briew ki bym dei ki trai shnong sha ki jaka ba sngewkhia jong ka Jylla Meghalaya.
“Ïa kane ka jingjia kaba sngewsih lah ban ïada lada la don ka rukom ai jingshngaiñ kaba khlaiñ. Da kaba shim ïa kine ki jingjia, ngi kyntu jur ban pyntreikam noh mardor bad pura ïa ka Inner Line Permit (ILP) sha baroh kawei ka Jylla Meghalaya,” bynrap ka Seng. Ka Seng ka la pynkut da kaba ong ba ka ILP kumba ka treikam ha kiwei pat ki jylla jong ka thaiñ shatei lammihngi, ka la paw ba ka long ka jingïada kaba kongsan bha ha ka riti synshar hapoh ka aiñ Bengal Eastern Frontier Regulation Act, 1873 ban ïada ïa ki trai ri trai muluk bad ban pynneh ïa ka jinglong ryntih jong ka jingbun briew bad ka kolshor.
