Khliehriat, Naitung 04
Ka Wahsanphaw SC Sohkymphor, Youngstars SSC Huroi bad Rymbai SYWO ki la ïoh jingjop ha ka lympung ïalehkai 3rd Division League Stage ba la pynïaid da ka East Jaiñtia Hills District Football Association (EJHDFA) ka la ïai bteng ha madan Artificial Turf Diengshynrum, Khliehriat.
Ha ka jingïalehkai kaba la long ha ka 4 tarik Naitung, ka Wahsanphaw SC Sohkymphor ka la pynliem ïa ka Umlawang SC da 3-0 kol. Ïa kine kol jong ka Wahsanphaw SC Sohkymphor la thep da u Iaibha Miki Talang (41), Dayomiki Lyngdoh (66) bad Iakitlang Lyngdoh (69).
Ha ka jingïalehkai kaba bud ka Youngstar SSC Huroi ka la jop da 1-0 kol pyrshah ïa ka Mynkre SC bad ïa kane ka kol la thep da u Different Surong (66).
Ha kawei pat ka jingïalehkai ka Rymbai SYWO ka la pynrem ïa ka Sonapyrdi FSC da 1-0 kol lyngba ka kol na u Heijuh-i-por Dkhar (30).
Ha ka 5 tarik Naitung ka jingïalehkai kan long hapdeng ka Lumshyrmit SCSC bad Pynurkba Christian SC ha ka por 11.00 baje mynstep, ka Borghat SCSC pyrshah ïa ka Lama Youth SC ha ka por 1.00 baje mynsngi, ka Cham Cham SC pyrshah ïa ka Nongthymme SC ha ka por 3.00 baje nohphai sngi.
