New Delhi, Naitung 04
Ha ka khyllipmat kaba naduh pateng la pateng bad ka jingsarong ïa ka ri, ka President ba donburom jong ka ri India, ka Droupadi Murmu, mynta ka sngi ka la kaweh lama ïa ki lai tylli ki trophies ba pawnam jong ka Durand Cup na Rashtrapati Bhavan Cultural Centre (RBCC), kaba long kum ka jingsdang jong ka Indian Oil Durand Cup kaba 134 – ka lympung ïalehkai phutbol kaba la rim tam ha Asia bad kaba pawnam tam ha India.
Kane ka dei ka snem kaba ar sien lynter ba ka President ba donburom ka la leh ïa kane ka dak, kaba pynskhem biang ïa ka jingdonkam jong ka Durand Cup kum ka jingïakynduh lang kaba kyrpang jong ka jingïalehkai, ka jingshakri bad ka jinglong ka jaitbynriew. Ka jinglehkmen ka bteng ruh ïa ki rukom leh tynrai kaba sngewsarong hadien ka jinglaitluid jong ka jingïadei beit jong u Nongïalam khlieh duh bad ka Durand Cup.
Ha ka jingïalang ha ka RBCC la don lang u General Anil Chauhan, khlieh duh ka tnad ïada ri, u General Upendra Dwivedi, khlieh duh shipai ryngkew, u Admiral Dinesh K Tripathi, khlieh duh shipai duriaw, u Air Marshal Amar Preet Singh, khlieh duh shipai suiñ bad u Lt General RC Tiwari, u GOC-in-C jong ka Eastern Command bad u Patron, ka Durand Cup Organizing Committee (DCOC). La pynkup burom ruh ha kane ka sngi ïa u nongïoh khusnam Arjuna Award bad u nongïalehkai phutbol ba pawnam ka ri India u Sandesh Jhingan.
Haba kren ha kane ka sngi, ka President Murmu ka ithuh ïa ka Durand Cup kum ka dak kaba im jong ka pateng ïalehkai phutbol jong ka India bad ka jingaiti jong ki shipai ha ka jingïalehkai, da kaba bynrap ba “ka phutbol ka don ïa ka jaka kaba kyrpang ha ki dohnud jong ki million ngut. Kam dei tang ka jingïalehkai; ka long ka jingsngewtynnat. Ka jingïalehkai phutbol ka long baroh shaphang ka buit, ka jingshah shitom bad ka jingïatreilang sha ka thong. Ki lympung ïalehkai kum ka Durand Cup kim pynroi tang ïa ka mynsiem ïalehkai hynrei ki ïarap ruh ban pynroi ïa ka pateng ban wan jong ki nongïalehkai phutbol, ka long ka rynsan kaba ailad ïa ki ban kiew. Ka la pynpaw ka jingsngewnguh ïa ka bynta jong ki shipai ban pynim bad kyntiew ïa ka mynsiem jong ka Durand Cup.”
U General Anil Chauhan, khlieh duh ka tnat ïada ri ha kane ka sngi u la ong, “Ka Durand Cup ka dei ka pateng jong ka jingshlur, ka jinglong ryntih, bad ka jingïatylli kaba pynpaw ïa ki riti dustur ba bha tam jong ki shipai jong ngi bad ka jaitbynriew jong ngi. Katba ngi dang sdang ïa kawei pat ka lynnong jong kane ka jingïakop kaba pawnam, ngi ïoh burom ïa ka jingdon ryngkat jong ka President ba donburom jong ka ri India ha kaba pynsdang bad kaweh lama na ka bynta kane ka lympung. Kane ka jingleh ka pynskhem biang ïa ka jingïadei kaba neh hapdeng ka jingïalehkai, ka jingshakri, bad ka mynsiem jong ka ri India.”
U Lt General RC Tiwari, GOC-in-C Eastern Command bad Patron jong ka DCOC, ha ka jingkren, u la pynpaw biang ïa ka jingdonkam jong ka Durand na ka bynta ki samla ba don sap ïalehkai phutbol ha ka ri da kaba ong, “Ka Durand Cup, kaba la pynlong da ki shipai India na ka bynta ki shipai India, ka long kaba kham palat ban ïa ka jingrakhe ïa ka jingïalehkai phutbol jong ngi. Ka dei ka jingrakhe ïa ka jingïatylli jong ka India ha ka jingpher, ïa ka jingngeit jong ngi ha ka jinglong lyngba ka jingïakhun, bad ïa ka kamram jong ngi ban pynroi ïa ka pateng ban wan lyngba ki jinglong ba khlem kut por jong ka jingïatreilang, ka jinglong ryntih bad ka jinglah ban ïakhun.”
U Sandesh Jhingan, uba la long kum kapten jong ka kynhun ïalehkai ka ri ha ki katto-katne ki khep, u la pynkynmaw ïa ki jingïakynduh ba neh jong u ha ka Durand Cup bad u la ong, “Ngi la ïalum hangne mynta ka sngi ym tang ban plie paidbah ïa ka khusnam, hynrei ban rakhe ïa ka pateng, ka dustur kaba la rim da ki spah snem, kaba la don, da ka jingsngewnguh ïa ka mynsiem jong ki shipai India ka la don ka bynta kaba kongsan ha kaba pynwandur ïa ka jingïaid lynti jong ka phutbol India: ka Durand Cup.”
U Lt Gen Bhavnish Kumar GoC ka Delhi Area bad Chairman ka Standing Working Committee jong ka Durand Football Tournament Society ha ka jingkren, u la ong, “Ka Durand Football Tournament Society ka la ïeng slem bha kum ka dak jong ka jingtbit ban kyntiew ïa ka phutbol ha ka jaidbynriew jong ngi. Ngi pynsngew ïa ka jingkyrkhu kitbok-kitrwiang sha baroh ki kynhun kiba ïashim bynta ha kane ka lympung ba kin long ki jingïalehkai kiba jop bad kiba don mynsiem ïakhun ha ka jingïalehkai.”
Ki lai tylli ki khusnam ba la burom bha – ka Durand Cup, ka President’s Cup bad ka Shimla Trophy – mynta kin sdang ïa ka jingïaid lynti ïa ki bun tylli ki nongbah ha kylleng jong san tylli ki jylla ba pynlong mynta u snem: ka West Bengal, Jharkhand, Assam, Meghalaya bad Manipur. Ka Trophy Tour ka thmu ban pynmih ïa ka jingsngewtynnad jong ki paidbah bad ka jingsngew sarong jong ka imlang-sahlang ha ka jingïalam sha ka jingsdang jong ka lympung ha ka 23 tarik u Naitung, 2025. Ka jingïakhun phainal la buh ban long ha ka 23 tarik u Nailar 2025.
Ha 137 snem, ka Durand Cup ka la long ym tang ka lympung ïalehkai phutbol – ka la long ka jaka sdang ïa ki samla ba donsap ïalehkai jong ka India. Slem bah shwa ba kin kylla long ki kyrteng ha ïing, katto-katne na ki nongïalehkai phutbol ba pawnam tam jong ka India ki la shim ïa ki sienjam ba nyngkong eh jong ki ha ka madan ba la pynkyntang jong ka Durand. Ka Durand Cup ka long ruh ka pateng jong ki angnud, ka rynsan jong ka Jingkular.
Ka pateng kaba neh jong ka lympung ka shong ha kane ka jingkular hi – ban ailad ïa ki nongïalehkai bym tip na man la ki dong jong ka ri ban tynjuh ïa ka jingtbit jong ki, ban ïoh ïa ka jingithuh bad ban beh ïa ki jingangnud jong ki.
Mynta u snem ha ka sien ba nyngkong eh, ka Durand Cup ka long ha kylleng jong san tylli ki jylla – West Bengal, Jharkhand, Assam, Meghalaya bad Manipur. Kumjuh, ha ka por ba ka phutbol India ka dang wad ïa ki riewshlur ba thymmai bad ka jingngeit ba thymmai, ka Durand Cup ka dang ïaibteng ban shakri kum ka rynsan ban tei ïa ka jaitbynriew – ka jaka ïakhun ha kaba ki nongïalehkai phutbol kiba kwah ban long ki nongïalehkai phutbol na ki jaka pule, ki kynhun jaka trei bad ki klob jong ka jylla na ki jaka ba jngai bad ki jaka kyndong tam ha ka ri ki lah ban kiew shaphrang..
Ka Durand Cup ka pynpaw ïa ka jinglong ryntih, ka jingïatylli bad ka jingtbit ha ka jingïalehkai. Ka jingpynbna mynta ka sngi, kaba la pynitynnad da ki nongïalam shipai ba ha khlieh duh, ka la pynpaw ïa ka jingangnud ba skhem jong ki shipai ban pynroi ïa ki sap bad ban pynroi ïa ka mynsiem ïalehkai ha kylleng ka ri India. Katba ki khusnam ki dang ïaid lyngba ki jaka ïalehkai phutbol jong ka ri, ka Indian Oil Durand Cup kaba 134 ka kular ym tang ïa ka jingïakhun kaba pynkmen hynrei ïa ki lynnong kiba thymmai ha ki jingangnud ïalehkai jong ka India. La pynmeh ïa ka ding bad la pynkhreh ïa ka madan – ha kylleng ki shnong bad ki nongbah, da ki hajar ngut ki nongïalehkai phutbol samla mynta kin ïohi ïa ka jingïalehkai ym tang kum ki nongpeitkai, hynrei kum ki nongphohsniew bad ki nongjop ha ka lawei.
