Youngstown, Naitung:
Ha kane ka jingjia, la ong ba 4 ngut ki shi-iing, ki la khlad noh ha ryngkat bad u Pilot bad u Co-pilot, kiba pynher ia katei ka liengsuiñ rit ha katei ka sngi hadien ba ka la mih na ka Kad Liengsuiñ na Ohio.
La ong ba katei ka liengsuiñ ‘Cessna 441’ kaba don ar tylli ki ‘engine’, ka la leit hap bakla hajan ka Kad Liengsuiñ jong ka Youngstown-Warren Regional Airport, ha ka step jong ka Sngi U Blei. Bad la ong ba ym don shuh kiba lait im na katei ka jingjia, ong u Executive Director ka Western Reserve Port Authority u Anthony Trevena haba ai jingkren sha ki nongthoh khubor.
Ki jingthoh jong ka Agency ki pyni ba ïa katei ka liengsuiñ la pynrung kyrteng ha ka Meander Air LLC jong ka Warren, Ohio.
U Coroner jong ka Trumbull County, u Lawrence D’Amico, ha ka Sngi Ba-ar, u la iathuh ba kitei ki briew kiba la iap ki kynthup naduh ki nongpynher ia ka liengsuin, U Joseph Maxin, 63 snem ka rta bad u Timothy Blake, 55 snem ka rta, ha ryngkat bad ki nongleit kiba shong hapoh kiba kynthup ia ka Veronica Weller, 68 snem ka rta; u tnga jong ka, u James Weller, 67 snem ka rta; u khun jong ki, u John Weller, 36 snem bad ka tnga jong u, ka Maria Weller, 34.
U D’Amico, u iathuh ba katei ka longiing- ka don ia ki karkhana shna nar ha ka thaiñ Youngstown-Warren, hynrei ki la mad noh ia kane ka jingjia ba sniewbok hapdeng ka jingleit kai ban pynlut ia ka shuti jong ki ha Montana.
Haba iadei bad kane ka jingjia, la ong ba katei ka liengsuiñ ka la leit hap ha ki dieng kiba heh bad kaba la pynlong ia ka, ban poi sha katei ka jaka.
Katkum ka jingpeit-thuh jong ka tnat ba peit ia ki liengsuiñ, ka pyni ba ka jaka ba katei ka liengsuin, ka leit hap, ka dei ha Bozeman, Montana, ong U Michael Hillman, u President jong ka kompeni liengsuin JETS FBO Network.
Ka FAA bad ka National Transportation Safety Board ki dang pyniaid ia ka jingtohkit hynrei kim shym la lah ban batai ia ka daw kaba lah ban wanrah ia katei ka jingjia ha katei ka sngi. Kumta ruh ki heh ki la bthah ia ki nongshong shnong ba kin iakynduh ia ki lada ki don ia ki video ba ki ioh ban ring-dur kaba lah ban pyni ia ka jingleit hap jong katei ka liengsuiñ ha katei ka por.
