Shillong, Naitung 04
Kum ka sienjam kaba kongsan ban pynbeit ïa ka jingïakajia pud kaba la neh da ki phew snem hapdeng ka Assam bad ka Meghalaya, u Myntri Rangbah ka Jylla Assam, Himanta Biswa Sarma ha ka Sngi Thohdieng u la ong ba la pynïeng ïa u mawpud banyngkong eh ha kawei na ki jaka ba don jingïakajia hynrei kaba la dep ban ïa pynbeit pud.
U la ong ba kine ki mawpud nongrim jong ka “jingshai bad jingsuk” kin wanrah ïa ka jingsynshar sha ki jaka kiba ju don hapdeng ka kynrum-kynram.
“U mawpud ba nyngkong eh ba la pynieng ha khappud Assam-Megha-laya”, ka sienjam sha “ka jingpyntreikam ha madan ïa ka jingïateh kular jong u snem 2022,” la ong u Sarma ha ka jingthoh jong u ha X.
Watla na ka liang u Myntri Rangbah ka Assam um shym la ïathuh ïa ka jaka hynrei u la ong ba haba la weng noh ïa ka Meghalaya na ka Assam ha u snem 1972, ka bynta kaba kongsan jong u pud u sam jong ka Meghalaya bad ka Assam ka la sah khlem shai, kaba ju wanrah ïa ka jingkulmar bad jingïakynad hapdeng ki artylli ki jylla.
“Hadien sanphew snem, ha u snem 2022 hapoh ka jingïalam jong u Adarniya @narendramodi bad ha ka jingdon ryngkat jong u Adarniya @AmitShah, ki ar tylli jylla jong ngi ki la ïasoi ïa ka MoU kaba donnam ban sdang ban batai ïa ki pud ki sam jong ngi,” u la thoh ha X, da kaba kdew ïa ka jingïateh kular ba ki ar tylli ki jylla ki la ïasoi ha ka nongbah jong ka ri.
U Sarma u la bynrap ba hynriew tylli na ki khatar tylli ki jaka ïakynad la pynbeit bad ki soh jong kata ka jingïateh kular mynta ki dang tuid katba ki mawjam ba nyngkong ki dang mih.
“Kumta, kumno kine ki nongrim ki pynbha ïa ka jingïatylli hapdeng jong ngi shipara? Ki briew bad ka jingsynshar na baroh arliang mynta ki don ïa ka jingshai kaba thikna halor ka bor synshar. Ka jingsynshar ka lah ban tyngshaiñ khatduh ha kine ki jaka ki bym don ka jingsngewthuh sngewthaw ne ki jaka ba don ka kynrum-kynram,” la bynrap shuh shuh u Sarma.
Kine ar ngut ki Myntri Rangbah, ha ka jingïalang ba la pynlong ha ka 2 tarik u Jylliew, ki la pynbna ba yn pynïeng ïa ki maw khappud ha ki phra tylli ki jaka ba don ka jingïakynad ha shwa ka sngi rakhe laitluid ka Ri.
Halor ka bynta kaba hynriew jong ka jingïakynad, kaba la kynthup lang ha ka jingïateh kular jong u snem 2022, ki la ong ba ha kaba ïadei bad ka thaiñ Pilingkata bad ka don katto katne ka jingïapher ha ka jingbatai, kaba ki Deputy Commissioner jong baroh ar tylli ki jylla kin shong bad ïakren.
U Sarma u la bynrap ba baroh ar tylli ki jylla ki la rai ban shim shakhmat ïa ki jingïakren halor kiwei pat ki hynriew tylli ki jaka ba don jingïakynad, hynrei ym shym la buh por ban pyndep ïa ki. Ka Assam bad ka Meghalaya ki don ka jingiakajia kaba la slem bha ha ki 12 tylli ki jaka kiba don ha shilynter u khappud uba jngai 884.9 km. Ki ar tylli ki jylla ki la ïasoi ïa ka soskular ha u bnai Risaw 2022 ha ka jingdon lang u Myntri Kam Pohïing jong ka Sorkar Pdeng u Amit Shah ha New Delhi sha ka jingpynkut noh ïa ki jingïakynad ha ki hynriew tylli ki bynta.
Na ki 36.79 sq km ki jaka ba don jingïakajia kiba la shim ban pynbeit ha ka bynta ba nyngkong ha ki hynriew tylli ki jaka, ka Assam ka ïoh 18.46 sq km bad ka Meghalaya ka ïoh 18.33 sq km. Ka Meghalaya ka la shah kerkut na ka Assam ha u snem 1972 bad naduh katei ka por ka la tuklar ïa ka Assam Reorganization Act, 1971, kaba la ithuh da ka Assam kum u pud u sam jong ka.
