Shillong, Naitung 04
Ka kynhun jong 100 ngut ki khynnah pule na phra tylli ki Jylla ka Thaiñ Shatei Lam Mih-ngi ki la leit jngoh ïa ka Indian Space Research Organization (ISRO) Centre ha Bengaluru ha ka 26 bad 27 tarik mynshem bnai.
Kane ka long kum shi bynta jong ka North East Students’ Programme for Awareness, Reach, and Knowledge on Space (NE-SPARKS) ba la bei tyngka da ka North Eastern Council (NEC).
Ha kajuh ka por, ka la ai lad kyrpang ïa ki ban sakhi ïa ka jingnang kiew ka India ha ka liang ka jingstad bad jingwad bniah haw-haw. Ha kane ka jingleit jngoh kaba ar sngi, ki samla pule ki la leit jngoh ruh ïa ki tnad treikam ba kongsan jong ka ISRO. Ha ka sngi banyngkong ki la leit ban jngoh ïa ka ISRO Telemetry, Tracking and Command Network (ISTRAC), katba ha ka sngi kaba ar, ki la leit jngoh ïa ka U R Rao Satellite Centre (URSC), ba kynthup ïa ka jingleit jngoh kaba bniah ïa ka ISRO Satellite Integration and Test Establishment (ISITE).
Ki samla pule ki la peit ruh ïa ki dur-khih ba kyrpang jong ka jingïaid lynti kaba jop u ‘Chandrayaan-3’ bad ki la sakhi ïa ka jingpyni haw-haw kaba bniah halor ki rukom treikam ki ‘Satellite’, ki ‘model’ jong ki bad ki jingpyni ba ai jingtip halor ki kor teknoliji nalor kiwei-kiwei.
Kane ka jingleit jngoh kaba kit jingmut bad kaba ngam jylliew ka la pynïar shi kat dei ïa ka jingsngewthuh jong ki shaphang ka saïan halor ka haw-haw bad ka la khring ïa ka jingsngewtynnad ban phai khmat sha ka lawei ha ka liang ka ‘Astronomy’, ‘Space Research’, bad Science, Technology, Engineering, and Mathematics (STEM).
Shuh shuh kane ka jingleit jngoh ka long shi bynta jong ka jingthmu ba kham heh ha ka ban ailad ïa 800 ngut ki samla pule ‘Science’ kiba don sap-mar 100 ngut na ki phra tylli ki Jylla ka Thaiñ Shatei Lam Mihngi-kin ïoh ka lad ban leit jngoh ïa ka ISRO. Haduh mynta, la pynlong ïa ar tylli kiba kum kine ki jingleit jngoh, kynthup ïa kane kawei. Ïa kane ka prokram la pynwandur khnang ban pynshlur ïa ki khun samla da kaba ai lad ba kin mad markhmat ïa ki buit stad teknoliji bathymmai haba ïadei bad ka haw-haw kumjuh ban ai lad ïa ki ban ïakynduh bad ïakren bad ki stad saïan bad karikor ka ISRO. Nalor kane, yn sa pynlong shuh ïa kiba kum kine ki jingleit jngoh ha ryngkat ka jingïatreilang bad ki Sorkar Jylla bad shlem jingpule ban pyntikna ïa ka jingkner kaba kham ïar bad ka jingktah kaba kham jylliew ha kylleng ka thaiñ.
