Jowai, Naitung 04
Ki khun ka Niamtre hapoh ka Raij Jowai ryngkat ka jingïadon bynta lang ki shakri Niam ka Raij Chyrmang, Tuber bad Ïalong katkum ka nongrim hikai niam ki la pyndep ïa ka lehniam Knia ainguh-aidem ba shisien shisnem ïa u Syiem Pyrthat ha ka duwan kñia ba don ha Loom Mookhai.
Ha kane ka step shwa ban mih na ïing Langdoh ka la don ka lehniam peit ‘Tpu’ ba la shet da ka Langdoh ha kaba u Dolloi, u Pator, u Langdoh, ki Sangot ryngkat ki shakri niam ka Raij Jowai kin peit bad bishar ïa ki dak ki shin ba paw ha ki lai tylli ki Tpu Niam kiba long ka dak ka sakhi blei ban pyni ha ka jingïadei bad ka rukom treikam ka raij ka shnong, u Doloi bad u Langdoh-ka Langdoh.
Hakhmat ka duwan ïa kane ka jingknïa ainguh la pyndep da u Sangot Paswet ha ryngkat ka jingsynranlang u Sangot Pasubon bad u Sangot Pakyntein kiba long ki pateng khun pateng ksiew ka kur Sookpoh Khat-ar Wyrnai.
U Doloi ka Elaka Jowai Ma Puramon Kynjing haba ai jingkren ha ka jingïadei bad ka lehniam Knia Pyrthat u la ïathuh ba kane ka dei kawei na ki jinglehniam ha kaba ki Soo Langdoh ba kynthup ïa u Langdoh Kongwasan Chyrmang, Langdoh Tuber, Langdoh Ïalong bad Langdoh Jowai ki shim ban pyndep ïa kane ka lehniam kyrpang ban ai nguh ai dem ïa u Syiem Pyrthat bad ïa u Mon Ryngklaw.
Shuh shuh u Dolloi kum khlieh ka niam khlieh ka Elaka u pynpaw ka jingsngewnguh sngew burom ïa ki shakri niam ki Soo Langdoh bad u khim lynti ruh ba kumba ki dak ki shin jong ka jinglehniam ki pyni ïa ka jingman miat manbha, u don ruh ka jingkyrmen ba ki u Blei Nongbuh Nongthaw un ïai theh sei ki jingkyrkhu na ka bynta ka man miat man bha, ka roi ka par bad ka shongsuk shongsaiñ ka shong ka raij bad ka ri ka muluk.
