Shillong, Naitung, 04
Ka Institutional Biosafety Committee (IBSC) NEIGRIHMS ka la pynlong ïa ka prokram halor ka phang “Biosafety regulations and their implications on Bio-medical research” ha ka 1 tarik u Naitung 2025. Ha kane ka jingïalang la ïashim bynta da palat spah ngut ki nongïashim bynta na ki tnad bapher-bapher ha NEIGRIHMS. La pynlong ïa kane ka prokram ban pynsngewthuh ïa ki nonghikai, ki doktor ba la kham rangbah bad ki samla pule ba la pyndep ïa ka jingpule ha NEIGRIHMS shaphang ki kyndon biosafety ha India, ka jingdonkam jong ki bad ka jingdonkam ban bud ryntih da ki riewstad saiantis kiba donkti ha kano-kano ka jingit bnïah ha ka bio-medical kaba kynthup ïa ki khñïang jingpang kiba lah ban pynlong ïa ki jingpang ha u briew, u mrad bad ki jingthung.
U Director ka NEIGRIHMS, Prof. (Dr.) Nalin Mehta, ha ka jingkren plie u la kren halor ka jingdonkam jong ka biosafety na ka bynta ban pynthikna ïa ka jingkoit jingkhïah bad ka jingbit jingbiang jong ki nongtrei laboratory. U Prof. Mehta u la bynrap shuh shuh ba ka NEIGRIHMS ka shimkhia bha ha ka jingwad bniah & jingpynroi na ka bynta ka jingmyntoi jong ka imlang sahlang bad ka jingshngain ha ki jaka trei ha ka jingwad bniah ka long kaba kongsan tam ha ka pdeng jong ngi. U la ïaroh ruh ïa ka jingpyrshang jong ka Prof. Vandana Raphael, Chairperson, IBSC, NEIGRIHMS bad u Dr. Pranjal Pratim Saikia, Member Secretary of IBSC ha kaba pynlong ïa kum kine ki jingïalang bad ban kyntiew ïa ka jinglong kaba ïadei bad ka jingwad bniah hapdeng ki nonghikai & nongtrei jong ka jaka pule.
U Prof. Probodh Borah uba dei u Director jong ka Research (Veterinary) na Assam Agricultural University (AAU) u la batai shaphang ki jingma bapher bapher kiba lah ban mih haba trei bad ki khñiang jingpang ba shyrkhei. U Prof. Borah u la pynksan ruh shaphang ka jingshngain ha ka kam jong ki nongwad bniah bad ki nongtrei ha ki laboratory bad u la batai bniah ïa ki lad ki lynti kiba donkam ban ïada na ka jingshah ktah khlem da thmu ha kum kine ki khñiang jingpang. U Prof. Borah u la pynpaw shuh shuh ïa ki kyndon ba la bthah da ka tnad Biotechnology, ka Sorkar India, ka tnad nodal kaba ïadei bad ki mat biosafety ha ka ri, ban pynthikna ïa ka jingpyndonkam kaba shngain bad ban ïada na ka jingpyndonkam bakla ïa ka jingstad r-DNA bad ki khnïang jingpang kiba shyrkhei ha ki kam wad bniah bad pynroi.
Ka long kaba kongsan ban tip ba ïa ka NEIGRIHMS Institutional Biosafety Committee (IBSC) la thaw ha u snem 2024 bad la pynrung kyrteng ïa ka ha ka tnad Biotechnology (DBT) hapoh ka tnad Science and Technology, Govt. of India.
