
Aizawl, Naitung:
Ka Sorkar Mizoram ka la pynlut haduh T. 98.84 klur hapoh ka skhim ba kongsan jong ka ‘Bana Kaih’ (Skhim bat kti) na ka bynta ban thied ïa ki san tylli ki jingthung ba kongsan, kaba pynskhem biang ïa ka jingkular jong ka ban kyrshan ïa ki nong-rep trai ri bad ban pynïoh biang ïa ka hok jong ki ha ka liang ka ïoh ka kot.
Katkum ka jingong u Dr. K.C. Lalmalsawmzauva, nong-ai jingmut jong u Myntri Rangbah ka jylla bad u Co-Chairman jong ka Mizoram Agricultural Marketing Board (MAMB), ka sorkar ka la thied bad pynïoh da 2,33,604 kwintal u sying, siew T. 96.4 klur sha ki nongrep, 1,473 kwintal u khaw bym pat tylliat na ka bynta T. 44 lak, 2,498 kwintal u synsar na ka bynta T. 2 klur lyngba ka PSU. Nalor kane 400 kwintal u shynrai ba la dep ban thied.
Palat 37,800 tylli ki kwintal ki lyngkhot lyng-khai la thied da ki nongthied kiba la pynrung kyrteng bad ki bym shym la pynrung kyrteng .
Ka jingthied ïa u sying, uba bun tam napdeng ki san jait ki jingthung, la pynlong lyngba ka MAMB bad la pynkut dang shen, ha kaba ïa u sohjew la lum beit na ki nongrep naduh u bnai Rymphang jong une u snem.
U Myntri Rangbah ka jylla u Lalduhoma, uba la ïashim bynta ha ka jingpynkut ïa ka jingthmu ban kyrshan ïa ka dor jingkyrshan ha ka lah sngi u Blei, u la pynskhem biang ïa ka jingkular jong ka sorkar ban buh hakhmat eh ïa ka rep ka riang bad ban pynkup bor ïa ki nongrep.
“Ngi pynphai biang ïa ka burom jong ki nongrep, ngi kyntiew ïa ka rep ka riang bad ngi thmu ban pynithuh ïa u sohjew Mizoram kum u jingthung ba pawnam jong ngi,” ong u Myntri Rangbah ha ka jingthoh ha ka rynsan X.
Kane ka jingthied ka long katkum ka jingkular jong ka sorkar Zoram People’s Movement (ZPM) shwa ka ilekshon ban thied ïa u sying, shynrai, sohmynken Mizo, synsar bad u khaw bym pat tylliat na ki nongrep, khnang ban pynshlur ïa ki rukom rep kiba pyndonkam ïa ki jingbam ba kynja met bad kiba lah ban pynneh pynsah.
Ka sorkar ba la ïalam da u Lalduhoma ka dang pyrkhat ruh ban pynithuh ïa u sying Mizoram ha ka kyrdan jong ka ri, da ka jingthmu ban pynlong ïa u kum u mar ba rem dor katkum ka rukom rep jong ka jylla.
Ki heh sorkar ki la pynksan ba ka skhim ‘Bana Kaih’ kam shym la kyrshan tang ïa ki nongrep lyngba ka jingpynthikna ïa ka dor hynrei ka la pynbha ruh ïa ka jinglah jong ki ban leit sha ki ïew ki hat bad pynduna ïa ka jingeh hadien ka jingot, kaba la ïarap ïa ka ïoh ka kot kaba kham skhem kaba pynshong nongrim ha ka rep ka riang ha Mizoram.