Shillong, Naitung 04
Ka Ïingbishar ha ka Sngi Thohdieng ka la pynngat biang sa 14 sngi ha ‘Judicial Custody’ ïa ka Sonam Raghuvanshi bad ïa u samla jong ka, u Raj Kushwaha, ha kaba ïadei bad ka jingkynnoh ba ki la donkti ban pynïap ïa u Raja Raghuvanshi hadien ba u Investigation Officer u la pan por biang na ka Ïingbishar.
Ha ka 21 tarik u Jylliew, ka Ïingbishar ka la pynngat ïa ki arngut ki nongshah kynnoh kata ka tnga jong u Raja Raghu-vanshi, ka Sonam Raghuvanshi bad u Raj Kushwaha ha ka jingshah set along kaba 13 sngi kaba la kut ha ka Sngi Thohdieng.
Haba kren sha ki lad pathai khubor ha ka Sngi Thohdieng hadien ka jingtian bishar ïa ka Sonam bad u Raj, u Assistant Public Prosecutor, Tushar Chanda, u la ong ba ïa kane ka jingtian bishar la leh lyngba ka ‘video conferencing’ kumba la leh ïa ki 3 ngut kiwei pat kata ïa u Akash Rajput, u Vishal Singh Chauhan bad u Anand Kurmi ha ka 3 tarik Naitung, 2025 ha kaba na ka liang ka ïingbishar ka la pynngat Judicial Custody ïa kitei 3 ngut kaba long 14 sngi.
“Ka Ïingbishar ka la pynjlan shuh-shuh ïa ka Judicial Custody jong ka Sonam bad u Raj sa 14 sngi. Ka jingbishar ka la long mynta ka sngi lyngba ka video conferencing,” ong u Public Prosecutor, Tushar Chanda.
U la ong ba ha ka kaiphod ba la phah, ka don ka jingthoh ba u Investigation Officer (IO) u lah ban pan por biang na ka ïingbishar ban phah biang ïa kitei ki arngut sha ka Police Custody’ ban tohkit biang ïa ki da ki bor Pulit.
Shuh-shuh, u Chanda u la ong ba kitei ki ar ngut lyngba ka ‘video conferencing’ ki la jubab hakhmat ka ïingbishar ba ki don hapdeng ka met-ka phad kaba koit ba khiah bad haba kylli, hato ki don eiei ban ong? Ki la jubab ba kim treh ban ong eiei.
Ka Sonam bad u Raj, kiba la shah kynnoh ba ki la donkti ban pynïap ïa u Raja Raghuvanshi, la pyni hakhmat ka kashari lyngba ka video conferencing na Shillong District Jail, kiba don ha kane ka jaka naduh ba la kem ïa ki.
Ka Sonam bad u Raj ha ryngkat bad lai ngut kiwei pat: u Akash Rajput, u Vishal Singh Chauhan bad u Anand Kurmi, ki la shah kynnoh ba ki la donkti halor ka jingthmu pynïap briew, ka jingpynïap briew, bad ka jingpynjot ïa ki sakhi-sabut hadien ba ki la dep ban leh ïa katei ka kam runar kaba la jia ha ka 23 tarik Jymmang 2025, ha Weisawdong, Sohra.
Kum ban shu kdew hangne ba u Raja Raghuvanshi bad ka kurim jong u, ka Sonam Raghuvanshi ki la jah rngai katba ki dang leit ‘Honeymoon’ ha ka thaiñ Sohra ha ka 23 tarik Jymmang, 2025 katba ïa ka met jong u Raja kaba la pyut bha la lap na ka Riat ha Weisawdong ha ka 2 tarik Jylliew, 2025.
Katkum ka jingtohkit da ka kynhun tohkit ba kyrpang ne ka Special Investigation Team (SIT) ka la pynpaw ba ka Sonam ka la pynngop ïa u Raja ban leit shangkai sha katei ka jaka kaba jngai, bad ki lai ngut kiba dei ki paralok jong u Raj bad ka Sonam ki la pynïap ïa u Raja da kaba bom bad tied ïa u da ka wait.
Haduh mynta ki la don 8 ngut kiba la shah kem ha kaba ïadei bad katei ka kam, kynthup ïa uwei u nongdie jaka, uwei u trai jong ka ïing kaba sahwai ka Sonam hadien ba ka lah dep ban leh ïa ka kam runar bad uwei pat u nongap pahara na Indore, uba la kynnoh ba u la ïarap ban buhrieh ïa ki sakhi sabut baroh.
