Oklahoma, Naitung:
Kawei ka doktor nong India, ka la shah kem noh ha United States hadien ba la shem ba ka pyniap hi da lade ia la ka khun 4 snem bad kynnoh pat ba katei ka khun ka iap ngam jyllop ha um, tang ban lait na ki jingpynshitom jong ki bor ka aiñ.
Katkum ki khubor, la ong ba ka Neha Gupta, 36 snem ka rta, ka dei ka doktor na Oklahoma bad ka la shah kem noh ha ka Sngi Nyngkong jong kane ka taïew ryngkat ki kyndon pynkheiñ aiñ kiba jur haba iadei bad katei ka jingleh kam sniew.
La ong ba ki pulit ki la shem ba ka Neha ka la pyniap hi ia la ka khun kynthei kaba la ithuh kum ka Aria Talathi bad hadien kata pat ka la leit pynngam ia ka sha um ban kynnoh ba ka la iap ngam jyllop hi khlem ka jingtip jong ka.
