Imphal, Naitung:
Ki pulit jong ka Manipur bad ki bor pahara ki la pynjur ïa ka jingthwet bad jingkhynra ba la ïalam da ki bor syntiat ha kylleng ki distrik bapher bapher jong ka jylla. Kine ki jingtreikam ba la ïatreilang, ba la pynlong hapdeng ka 30 tarik u Jylliew bad ka 1 tarik u Naitung, ki la pynlong ban ïohkem ïa kiba bun ki lehnoh na ki kynhun ba la shah ñiew beaiñ bad ka jingïoh kurup ïa ki tiar ïaleh, ki tiar siat, bad ki tiar kiba ïadei bad ka kam shipai.
Ha ka 1 tarik, Naitung, la ïoh ïa ka jingjop kaba khraw da ka jingïoh kem ïa u Namgaklung Kamei ba la tip ruh da ka kyrteng kum u November (42), uba la kam ïalade kum u Deputy Chief of Army jong ka Zeliangrong United Front (ZUF-J), na ka thaiñ Kekrupat ha Imphal West district. La ïoh ban kurup na u kawei ka pistol 9mm bad 10 song ki kuli bad kawei ka mobile phone.
Ha kane kajuh ka sngi, uwei u dkhot ba ehrang jong ka KYKL (SOREPA) uba la tip kyrteng kum u Mutum Ibohanbi Singh (49 snem) na Andro Khuman u la shah kem hapoh ka Andro Police Station ha Imphal East. La ïoh kurup ïa kawei ka mobile phone na u.
U Md. Ajad Khan ba la tip ruh da ka kyrteng kum u Kathokpa (29 snem) uba dei u dkhot ba trei shitom jong ka KCP (PWG) u la shah kem na Khurai Chaithabi Leirak kaba hap hapoh Porompat PS, Imphal East. La lap ruh ba u don ka mobile phone.
U Khulem Tulajit Meitei ba la tip ruh da ka kyrteng kum u Tulen (21 snem), uba don jingïadei bad ka KCP (Apunba) u la shahkem na Khurai Kongkham Leikai bad la ïoh kurup ïa kawei ka mobile phone.
Shisngi shwa kane, kata ha ka 30 tarik, Jylliew, u Khoirom Ingoton Singh ba la tip ruh da ka kyrteng kum u Tomba (48 snem ka rta) uba dei u dkhot ba ehrang jong ka KCP (NOYON/MFL) u la shah kem na Keirao Khunou kaba hap hapoh Irilbung PS, Imphal East. La kynnoh ba u Singh u la donkti ha ka jingdawa pisa na ki jaka pule jong ka thaiñ. Ki tiar ba la ïoh ban kurup na u ki long ka suloi Single-barrel, ka pistol 9mm bad ar song ki kuli bym pat pyndonkam, ka Military Gear, kynmthup ka Bulletproof Helmet bad Jacket, Radio wireless Sets. Ki tiar siat ba la ïoh ban kurup ki kynthup ruh
Ha kum kane ka jingleit khynra ban ïaleh pyrshah bad ki kam lehnoh, ki pulit ka Manipur ki la bteng ban pyntreikam ïa ki kyndon jong ki kali.
Ha ka 1 tarik u Naitung, la pynmih haduh 58 tylli ki challan, kaba la lum T.94,500 kum ka kuna. Ha ka 30 tarik u Jylliew, la lap ïa kawei ka kali ba la shahtuh, bad la weng ïa ki phlim ba la rong na ki 28 tylli ki kali ban pynthikna ïa ka jingbud ryntih bad jingtreikam jong ka aiñ.
