Shillong, Naitung 04
Ki nongïalam bad ki dkhot ka Meghalaya Greater Shillong Prog-ressive Hawkers and Street Vendors Associa-tion (MGSPHSVA) ki la pynpaw ba ka shem jingeh ïa ki ban shong die jingdie ha ka por ba la buh.
Ki la ong ba watla ki la pdiang sngewbha ïa ka rai ban don da u Special Officer ban lum jingtip ïa kiba bun ki bynta bym shai ha ka kam ba ïadei bad ka jingdie mar harud surok bad ha lynti ïaid kjat ha Khyndai Lad pynban ki kdew pat ba ka shem jingeh lada buh por ïa ki ban shong die jingdie.
Haba ïakren bad ki lad pathai khubor ha ka Sngi Thohdieng ka 04 tarik u Naitung 2025, ka Kong Angela Rangad, Adviser ka MGSPHSVA, ka la ong ba ka donkam ïa ka thup kaba shai halor ki nongdie madan bad dei ban shai paidbah bad bynrap naduh ba sdang ki kwah ban ïaid katkum ka aiñ.
Ka la ong ruh ba ka sorkar ka la dep ban shna ïa ka jaka ban pynkynriah ïa kiba shong die madan ha MUDA da kaba ong, hato ka la buh ïa kata ka jinglut-jingsep hakhmat u paidbah hynrei em? Ma ngi ki nongdie madan naduh ba sdang ngi la ong ba wat ym buh ïa kata ka 22 tarik, namar ba lada ka la biang lut baroh ngi kloi ban kynriah ban bud katkum ka aiñ thik-pa-thik bad kam don jingeh, hynrei ka jaka ha MUDA kam long kaba biang.
Ka la ong ruh ba mynta la ap ka ïap-thngan wat tang haba shah kyndang ruh bad ka shem jingeh shibun ban shong die jingdie katkum ka por ba la buh.
Shuh shuh ka la ong ba kane ka ïew ha Khyndai Lad ka dei ka ïew kaba pynkhring ïa ki nongwan jngohkai pyrthei, da kaba bynrap ba lada ym don shuh kiba shong die madan ha kine ki bynta ki dukan kiba don ha kine ki bynta ruh kan sa ïap ïew bad ha kata ka por ka sorkar kan sa jubab hi namar ka jingïap-thngan ka la ap lypa, namar ha kito ki sngi ba shu wan khynra ruh ki la jynjar ha ka liang ban pyndap ïa ki khun ki kti jong ki.
Haba ïadei pat bad ka pisa ba ka sorkar kan sa ïarap kumba T. 10,000 bad T.2000 na ka bynta ka san bnai, kim dei ban leh mynleh ba kato ka mih na ka jingsngew ieid ne ka jingbha ka sorkar, namar katkum ka aiñ kan hap don ka jingpynbeit (Regulation) ne ka bai lutksan (Compensation), bad ym tang katta ka sorkar ka dei ban leh jurip shwa ban peit ïa ka jingïoh jingem haba ki shong die jingdie ha surok bad shatei ka jaka ha MUDA ba ka long kajuh ne em, hynrei ïa kane ruh kim pat shym la leh, ong ka Kong Angela.
Na ka liang ki nongïalam ka Synjuk ba kynthup ïa ka Kong Biolinda Pyrtuh, President bad u Bah Shane Thabah, General Secretary, ki la ong ba ka jingïap-thngan ka la ap lypa tang na ka jingkhynra ruh bad ka jingbuh por ban die jingdie tang naduh ka 12:30 mynsngi haduh 2 baje nohphai sngi, nangta naduh 7:30 janmiet haduh 9 baje janmiet ka dei kaba eh palat ïa ki.
“Naduh nyngkong hi ka seng ka la ai jingmut ïa ka sorkar ba kan ïaid katkum ka aiñ bad haba ïaid katkum ka aiñ hi, yn lah ban pynwandur ïa ka Sor Shillong, hynrei lada kam ïaid katkum ka aiñ pat kan kulmar jingmut lut bad buh jingeh shibun,” ki la bynrap. Ki la pynpaw ruh ka jingbym sngewïahap ïa ka jingbuh por naduh 12 baje mynsngi haduh 2 baje nohphai sngi bad naduh 7 baje janmiet haduh 9 baje janmiet, namar ki bun ki jait mar ba kim lah ban shu thep ne buh beit shapoh byrni namar ba bun ki tiar pait bad ka shimpor ruh tang ban lum ïa ki mar.
