Shillong, Naitung 04
Ka Ïingkashari jong u B. Joshi, Special Judge ka (POCSO), Mendipathar, North Garo Hills District, ha ka 13 tarik u bnai Jylliew, 2025, ka la pynmih ïa ka hukum kaba rai ban pynshitom bad pynrem ïa u Mikseng B. Marak na Daram Tekalang hapoh ka kyndon 354C jong ka Indian Penal Code, ka jingshah set patok shisnem ïa u Mikseng B. Marak bad ka jingdaiñ kuna kaba T. 1,000 halor ka jingdonkti jong u ban leit peit tuh ïa kawei ka khynnah kynthei katba ka dang sum.
Ha ka kyrwoh ba la phah da u Superintendent of Police (SP) ka North Garo Hills, Resubelpara, la ïathuh ba katkum ka ejahar ba la mudui, kane ka jingjia ka la jia ha ka 26 tarik u Nohprah 2019, ha ka por kumba 4 baje janmiet, ha kaba utei u nongshah kynnoh u la peit tuh ïa katei ka kynthei katba ka dang sum ha ka kamra sum.
La pyntip ruh ba ïa kane ka jingtohkit la pynlong da ka Women Police Sub-Inspector, ka Bailine Sangma, bad ha ka jingtohkit kaba bniah la lah ban pynthikna ïa ka jingdonkti jong u Mikseng B. Marak lyngba ki sakhi kiba biang.
