Shillong, Naitung 04
Ki nongpynïaid jong ka Mattilang Park kaba don ha Laitmynsaw, Upper Shillong bad u trai jong ka Restaurant ki la ïathuh ba u nongrwai ba pawnam ka pyrthei u Ed Sheeran u la shong da ka bos Smit ban wan ringdur ïa ka ‘music video’ kaba ai kyrteng ‘Sapphire’.
U Ed Sheeran uba la wan ringdur sha Mattilang Park u la thep ha ka ‘music video Sapphire’ ha ka por ba u shong hakhmat ka restaurant kaba don ka jaka ïeng kali, nangta u shong sohpadoi, u ïaid ha jingkieng siej, u ïaid hajan ka Elephant Fall bad shong dih kophi bad ki paralok sa ha kawei ka restaurant kaba don shiliang ka jingkieng siej.
Ïa kane ka jingrwai, u Ed Sheeran u la wan ringdur ha Mattilang Park ha ka 11 tarik u Rymphang shisngi shwa ban leit rwai ha ka 12 tarik u Rymphang 2025 ha madan Polo bad u la pyllait paidbah ïa kane ka jingrwai ha ka 6 tarik u Jylliew 2025 ha ka channel Ed Sheeran ha kaba palat 95 million ngut kiba la peit ïa kane ka ‘music video’ kaba u la thep lang ïa ki durkhih kaba u la wan ring haba u wan rwai ha kylleng ki jylla jong ka ri India.
Ha shwa ba ka jingrwai ‘Sapphire’ kan kot 100 million ngut kiba peit ha youtube, U Nongsaiñ Hima u la ïoh ban ïakren bad u trai ka Restaurant ha Mattilang Park u Bah Jespar Marbaniang.
U Bah Jespar u la ïathuh ba u Ed Sheeran u la leit ringdur kylleng ki jaka hadien kata pat un sa wan dih kophi bad bam jingbam ha restaurant jong u.
“Ngi khlem ïoh ban shondur namar ngi la bunkam ha katei ka sngi ban pynkhreh bam ïa ka kynhun u Ed Sheeran,” u la ong.
U la pynpaw ka jingsngewkmen haba u la ïohi ha ka ‘music video Sapphire’ ba u Ed Sheeran u la buh lang ïa ka restaurant jong u ha ka por ba u dih kophi.
Ban tip kham bniah shuh-shuh la ïoh ban ïakren bad u Bah Regando Lyngdoh, Assistant Secretary Mattlilang Multipurpose Development Welfare Organisation ha kaba u la ïathuh ba u Ed Sheeran haba u shong da ka bos Smit u la hiar thied soh ha Laimer kaba u la pyllait lang ha ka jingrwai ‘Sapphire’.
Nangta u la ïathuh ha lynti u la ringdur ruh ïalade haba u shong hapoh ka bos dieng bad u la ringdur ruh ïa kawei ka khlaw kaba bun bha ki dieng kaba don syndah ka surok four lane ka lad ban leit sha Mattilang Park.
Namar kata, u Bah Regando u don jingkyrmen ba lyngba kane ka jingrwai u Ed Sheeran kan dang khring shuh-shuh ïa ki nongjngohkai pyrthei sha Meghalaya.
