Washington, Naitung:
U President ka US- u Donald Trump, u la iathuh ba ha ka jingiakren jong u bad u President ka Russia- u Vladimir Putin ha ka Sngi Palei, um shym la lah ban pynurlong ne pyn seisoh ia ka jing-iakren iasuk bad ka Ukraine.
La ong ba kane ka jing pulom ki jingthmu jong u Trump, ki long ruh ha kum kane ka por ba ka US ka dang pyrshang ban pyniaid shakhmat ia ka jingiakren iasuk hapdeng ka Russia bad Ukraine, ban pynkut noh ia ka jingiakynad hapdeng kitei ki arliang mamla, kaba la neh la palat 3 snem mynta. Nalor kata, la ong ba ka sorkar US ba mynta, hapoh ka jingialam jong u Donald Trump, ka la pynsangeh noh ia ki jingthmu ban phah tiar thma sha Ukraine namar u Trump u la ong ba ka sorkar barim hapoh ka jingialam jong u Joe Biden, ka la shu pynlut phut ia ka pisa bad ka la shu pynsyrwa kai ia ki tiar ïakhun thma, da kaba phah sngewbha sha Ukraine hapdeng ka jingiakynad jong ka bad ka Russia.
U Trump u la iathuh ba ka jingiakren hapdeng jong u bad u President ka Russia ha ka Sngi Palei, ka la neh slem bad u la ioh ban iakren ia kiba bun ki mat ba iadei bad ka Iran bad Ukraine. Hynrei u la ong ba um shym la lah pat ban pynpoi sha ka thong haba iadei bad ka mat jong ka Ukraine. Bad u pynpaw ruh ba u sngewkhia haduh katta halor kane.
Katkum ka jingpynpaw jong u Trump ia katei ka jingiakren phone, la ong ba u la pynpaw ia ka sngewsih kaba jur ba um shym la lah ban pyn urlong ia ka jingiakren iasuk ban pynkut noh ia ka jing-iakynad hapdeng ka Russia bad Ukraine.
Ha Russia pat, ka sorkar Russia ka la ong ba katei ka jingiakren phone hapdeng u Trump bad u Putin ka la neh la jan shi kynta bad ka la ong ba u Putin u la ban jur ba un nym kynran dien ne kylla na ki thong ba ka Russia ka la buh naduh ba sdang jong ka thma.
Ka Russia ka la batai bniah ruh ïa ki jingthmu ba kongsan jongka ha Ukraine, naduh ka jingpynduh noh ïa ki “daw tynrai” jong ka jingïakynad, da kaba dawa ba ka Ukraine ka dei ban iehnoh ïa ki jingthmu jongka ban ioh ban long ka dkhot jong ka kynhun NATO lada ka kwah ia ka jingsangeh thma ba shisha.
