Shillong, Naitung 04
Ka lympung ïalehkai State Level Subroto Mukherjee Cup Football Tournament 2025 jong ka Semi Final kaba long ka sngi ba saw ha ka 04 tarik u Naitung 2025 ka la long ha madan SSA Stadium, Polo Ground 1. Ha ka U-17 jong ki kynthei ka jingïakhun ka long hapdeng ka skul Nongjri Presbyterian Sec. School, Ri Bhoi pyrshah ïa ka North Liberty Hr. Sec. School, WJH ha ka por 10:30 mynstep. Bad ka jingïalehkai kaba bud ha ka por 12:15 shiteng sngi ka Tyrsad Hr. Sec. School, EKH pyrshah ïa ka Lotus Sec. School, EJH.
Ka Nongjri Presbyterian Sec. School, Ri Bhoi ka la pynliem noh da 1-0 kol ïa ka North Liberty Hr. Sec. School, WJH lyngba ka kol na ka Rimika Khongkai ha ka minit 40. Bad ka Tyrsad Hr. Sec. School, EKH ka la pynliem da 1-0 kol lyngba ka kol na ka Balabet Khongsit ha ka minit 60+14 ïa ka Lotus Sec. School, EJH.
Ha kane kajuh ka lympung ki la don ruh ki jingïalehkai jong ki shynrang ha ka kyrdan U-17 ha kajuh ka jaka. Ha ka por 2 baje nohphai sngi ka Bajengdoba Hr. Sec. School (North Garo Hills) ka ïakhun pyrshah ïa ka North Liberty Hr. Sec. School, WJH bad ha ka por 3:45 janmiet ka Nongjri Presbyterian Sec. School (Ri Bhoi) pyrshah ïa ka Wapung Hr. Sec. School (EJH).
Ka North Liberty Hr. Sec. School (WJH) ka la jop da 3-0 kol ïa ka Bajengdoba Hr. Sec. School (North Garo Hills) lyngba ki kol na u Nambor Lamat ha ka minit 15, u Iaisanlang Dohling ha ka minit 31 bad u Erickson Dohling ha ka minit 64.
Ka jingïalehkai kaba bud ka la long hapdeng ka Nongjri Presbyterian Hr. Sec. School (Ri Bhoi) kaba la jop da 2-1 kol ïa ka Wapung Hr. Sec. School (EJH). Ïa ki kol ka Nongjri Presbyterian Hr. Sec. School la thep da u Emerson Ryngkhlem ha ka minit 51 bad u Badonlang Syngkli ha ka 84 minit, bad ka shi kol jong ka Wapung Hr. Sec. School la thep da u Rooneybert Dkhar ha 56 minit.
Ha kane ka sngi la sdang da ki jingïalehkai jong ka U-15 ki shynrang ha kane kajuh ka jaka SSA Stadium, Polo Ground 1, ha ka por 7:30 mynstep ka Assam Rifles Public School (EKH) ka ïakhun pyrshah ïa ka Mawtneng UP & Sec School (Ri Bhoi) bad ha ka por 9 baje mynstep ka Govt. Boys Hr. Sec. School (WJH) ka ïakhun pyrshah ïa ka Little Star Eng. Med. Sec. School (Eastern WKH).
Ka Mawtneng UP & Sec School ka la jop da 1-0 kol ïa ka Assam Rifles Public School lyngba ka kol na u Malong Bey ha ka minit13, katba ka Govt. Boys Hr. Sec. School (WJH) ka la pynliem noh da 2-0 kol ïa ka Little Star Eng. Med. Sec. School da ki kol na u Elvinson Lyngdoh ha ka minit ba 32 bad na u Samewan Lytan ha ka minit ba 47.
Ka jingïakhun phainal lashai ka Sngi Saitjaiñ 05 tarik Naitung 2025 kan long ha kajuh ka jaka. Ha ka U-15 jong ki shynrang, ka Mawtnneg UP & Sec. School (Ri Bhoi) kan ïakhun pyrshah ïa ka Govt. Boys Hr. Sec. School (WJH) ha ka por 9 baje mynstep. Ha ka U-17 jong ki kynthei, ka Nongjri Presbyterian Hr. Sec. School (Ri Bhoi) pyrshah ïa ka Tyrsad Hr. Sec School (EKH) ha ka por 11 baje mynstep bad ha ka por 1 baje nohphai sngi ka North Liberty Hr. Sec. School (WJH) kan ïakhun pyrshah ïa ka Nongjri Presbyterian Hr. Sec. School (Ri Bhoi) jong ka U-17 ki shynrang.
