Shillong, Naitung 06
Ka Real Madrid ka la pynliem noh ïa ka Borussia Dortmund da 3-2 kol ha ka jingïakhun kaba itynnad shi kat dei jong ka Club World Cup kaba la long ha ka step jong ka Sngi U Blei bad kan ïakynduh semi final pyrshah ïa ka Paris St. Germain (PSG).
Katei ka kynhun ïalehkai ba khlaiñ bor na Spain ka la lah ban ïalehkai bha naduh kaba sdang ha kane ka jingïakhun kaba la long ha MetLife Stadium, ha kaba ka la ïoh ban thep ar kol ha ka kylla step lyngba u Gonzalo bad u Fran Garcia ha ka minit kaba 10 bad 20.
Wat hapdeng ka jingduna ka jingkhlaiñ jong ka jingïalehkai ha ka jingshit kaba jur jong ka New Jersey, ka Real ka la lah ban ïalehkai bha da kaba suk ban pynlong pat ïa ka Dortmund ban ym lah ban ïalehkai bha haduh kaba kut ka jingïalehkai.
U rangïalehkai mihpli u Maximilian Beier u la lah ban thep kol ha ka minit kaba 90+2 na ka bynta ka Dortmund, hynrei tang hadien ar minit u Kylian Mbappe u la lah ban pynphai kylla n aka bynta ka Real.
Shwa ban wai ka Dortmund ka la lah ban thep biang sa shi kol lyngba u Serhou Guirassy (80+8) ha shwa ba u Dean Huijsen un shah sei da ka red card ha shwa ban kut ka jingïalehkai. Kumta une u rangïalehkai un duh ïalehkai na ka bynta ka Real ha ka jingïalehkai semi final ka ban long ha ka 10 tarik mynta u bnai pyrshah ïa ka PSG, kaba la jop ha kawei pat ka jingïakhun quarter final pyrshah ïa ka Bayern Munich da 2-0 kol.
Kawei pat ka jingïakhun semi final kan long hapdeng ka Fluminense pyrshah ïa ka Chelsea ha ka 9 tarik.
