New Delhi, Naitung 06
U Myntri Rangbahduh ka ri, u Narendra Modi, u la ther tyngeh ïa ka Pakistan namar ka jing-kyrshan jong ka ïa ki kam lehnoh bad ai khu-blei ïa ki ri kiba ïeng ha syndah bad ka India ban pynrem jur ïa ka jingthombor ki lehnoh ha Pahalgam, Jammu & Kashmir.
Kane ka jingkynthoh u Modi ïa ka Pakistan ka la wan jia ha ka por ba u la ai jingkren ha ka jingïalang ‘BRICS Sum-mit’ kaba la long ha Brazil.
Ka jingthombor ki lehnoh ha Pahalgam, kaba don jingïadei bad ka Pakistan, ka la shim noh ïa ka jingim jong 26 ngut ki nongjngohkai pyrthei, ha kaba hadien kane, ka India, ka la ïaid shakhmat bad ka ‘Opera-tion Sindoor’ bad pynpra ïa ki jingtei bad ktem lehnoh ha Pakistan.
Na ka liang u Modi u la pynsngew sha ki nongïalam ka pyrthei ha ka jingïalang ‘BRICS Summit’ ba ka India ka dei ka lanot jong ki kam lehnoh katba ka Pakistan ka dei ka nongkyrshan, bad kumta ym lah ban thew ïa ki lanot bad ki nongkyrshan ha kajuh ka pyrla.
U la kren siat ruh sha kito kiba kren ne bym leh eiei pyrshah ïa ka jingsaphriang ki kam lehnoh na bynta ka jingmyntoi shimet ne ka saiñ pyrthei, bad kdew ba ka jingai jingmynjur kaba jar-jar ïa ki lehnoh kam dei kaba lah ban pdiang.
Ka India la bunsien ka la pyni da ki sabut kiba shai kumno ka Pakistan ka la pyndonkam ïa ki kam lehnoh kum ka ‘State Policy’ da kaba ai jingïada ïa ki lehnoh ha ka khyndew jong ka.
