Guwahati, Naitung:
Ka jingpang Japanese Encephalitis (JE) ka la shim ïa ka jingim jong 13 ngut ki briew ha Guwahati Medical College and Hospital (GMCH) naduh u Ïaïong, kaba la pynmih biang ïa ka jingsngewkhia hapdeng ki bor pynïaid ka koit ka khiah ha Assam.
Haduh ka 4 tarik u Naitung, ka Hospital ka la pynthikna ba ki don 50 ngut ki nongpang JE, ha kaba kiba bun ki nongpang ki wan poi na Kamrup (thaiñ nongkyndong), Nalbari, bad Darrang.
Katkum ka jingong ki heh jong ka hospital, 6 ngut ki nongpang ki la koit bad la pyllait noh ïa ki, katba 3 ngut ki la mih pyrshah ïa ka jingai jingmut ne jingbit jong ki doktor.
“Naduh ka 1 tarik u Ïaïong haduh ka 4 tarik u Naitung, ngi la pdiang ïa ki 50 ngut ki nongpang JE. Kiba 13 ngut ki la khlad noh,” ong u Dr Ujjal Kumar Sharma, Deputy Superintendent ka GMCH.
U la bynrap ruh ba ka jingwan tuid ka dei kaba bun na ki distrik ba marjan, ha kaba ki don 14 ngut na Kamrup, 10 ngut na Nalbari, bad 7 ngut na Darrang.
Ki la don shuh s alai ngut kiwei pat kiba ïoh pang kiba dei na Kamrup (Metro).
Ki jingbuh jingkynmaw bad jingkheiñ jong ka koit ka khiah jong ki jylla ki pynpaw ïa ka jingma kaba neh na ka JE, ka jingpang ba la pynsaphriang da ki khñiang kaba saphriang nyngkong eh lyngba ki khñiang Culex kiba kha khun ha ki jaka nongkyndong kiba don um.
Hapdeng u snem 2015 bad 2024, ka Assam ka la don palat 840 ngut ki briew kiba ïap na ka jingpang JE, kaba kiew tam ha u snem 2019 ha kaba ki don 161 ngut kiba ïap.
