Shillong, Naitung 06
Ka long ka jingkmen kaba khraw bad ka jingsarong ïa ka Jylla hi baroh kawei namar ka Kynjailin Lyngdoh Mawnai ka la lah ban khur ïa ka takma rnong na ka bynta ka ri India ha ka 9th South Asian Karate Champion-ship 2025 kaba la long ha Colombo, Sri Lanka.
Kane ka khlur ïalehkai ka Jylla ka la ïohpdiang ïa katei ka takma ha ka kyrdan ïalehkai U-21 Individual Kumite -50Kg ki kynthei ha ka sngi Saitjaiñ.
Kumba ka paw ka Kynjailin kaba dei ka samla kaba la shah hikai ha ka shlem ai jinghikai jong ka SAI Training Centre Shillong da u Sunil Rathi (SAI karate coach) naduh u snem 2020, ka la lah ban pynpaw ïa ka jingtbit ha ka lympung ïalehkai kaba dang shu dep shen ha 4th Senior and U-21 National Karate Championship 2025 ba la pynïaid da ka Karate India Organisation (KIO) ha Gachibowli Indoor Stadium, Hyderabad.
Halor kane ka jingwanrah nam bad burom ïa ka Jylla, na ka liang ka All Meghalaya Karate-Do Association (AMKA) ka la ai khublei halor kane ka jingjop jong katei ka ‘thei ïalehkai na ka bynta ka ri hi baroh kawei.
