Shillong, Naitung 06
Ka National People’s Party (NPP) ka la pynkhreh shaid- shaid ïa ka jingïakhun kaba khlaiñ ha ka ilekshon Garo Hills Autonomous District Council (GHA-DC) bad kyrmen skhem ba kan ïoh ïa ka jingjop kaba palat ïa shiteng na ka jingdon ki MDC hapoh ka ïingdorbar (absolute majority).
U Rakkam A Sang-ma, uba dei uwei na ki nongïalam jong ka NPP bad ruh u Myntri ka Sorkar Jylla u la ong, “Ngi la pynkhreh ïa ka jingïakhun kaba khlaiñ ha ka ilekshon GHADC bad ngi sngewskhem ba ngin ïoh ïa ka jingjop kaba heh.”
U Rakkam u la pyntip ruh ba ka seng kan mih ïakhun marwei ïa ka ilekshon bad kan ym ïateh-lok satia bad kiwei pat ki seng saiñ pyrthei haba bynrap “Klet noh ïa kiwei ki seng ba ïasngewthuh jingmut, klet noh ïa ka jingwan ïatrei-lang. Ka NPP kan trei shitom ban jop bun paid duh ha GHADC”.
“Ka Politic ka dei kaba pher bha bad ngi khmih lynti ïa ki jingmih bapher-bapher bad ki jingpynkhreh bapher-bapher. Kam dei kaba suk ïano ïano ruh. Khlem pep ka NPP kum ka seng, ngi la trei shaid-shaid ïa ka kam. Ngim kheiñ sting satia ïa ka kam,” u la ong haba jubab ïa ka jingkylli halor ka jingpynkhreh ki liang pyrshah ïa ka ilekshon.
U Rakkam u la pynpaw ba ka NPP kan pynleit jingmut ha ka ban pynphriang ïa ki khubor halor ki jingjop jong ka seng ha ki kam bapher-bapher. U la ong ba ka Sorkar hapoh ka jingïalam u Myntri Rangbah Conrad K Sangma ka la lah ban wanrah ïa ka jingkylla ha ka liang ka jingpynïasoh surok, ka koit ka khiah, ka pule-dangle, ka kam ïalehkai, ka rep ka riang bad kiwei kiwei.
“Hynrei, ki dang don shibun kiba hap ban pynjanai hynrei ngi la pyni sha ki paidbah ka Jylla bad ki paidbah ka Ri-lum Garo. Peit ïa ki surok kiba itynnad, ki madan ïalehkai, ki kolej ba bun, ki ïing skul ba bun. Ngi la pynkha ïa baroh ki laiñ pule ha baroh ki skul Sorkar. Ngi la kyntiew kyrdan bad ai ïa ki ïing paki ba bha ïa ki kolej. Ai ba ki paidbah kin bishar ïa ka jingtreikam jong kane ka Sorkar,” u la ong haba kyntu ïa ki nongthep vote ba kin bishar ïa ka jingtreikam ka Sorkar.
Haba kylli, u Rakkam u la ïathuh ba palat spah ngut ki kyrtong ki la pynpaw ïa ka jingkwah ban ïakhun na ka NPP bad ki don ruh bun ngut kiba ïaknieh ïa ka tiket na katto-katne ki konstitwensi.
