Mawkyrwat, Naitung 06
Ki khun ki kti jong u Bah Maniwell Jahrin kumba ju leh manla u snem, ha ka 5 tarik u Naitung, 2025 ki la pynlong ïa ka jingpynkup burom kyrpang ïa ki 17 ngut samla pule ka thaiñ Mawkyrwat kiba pass bha ha ka eksam SSLC 2025 kaba la tip kum ka “Maniwell Jahrin Award for Academic Excellence” hapoh Multipurpose Hall DC Office, Mawkyrwat.
Kum ban shu kdew, ïa kane ka Maniwell Jahrin Award for Academic Excellence la sdang nyngkong eh ha u snem 2004, kum shibynta ban pynsah jingkynmaw bad pynsah nam ïa u Bah Maniwell Jahrin (bam kwai ha dwar U Blei) da ki khun ki kti bad ka jingsam ïa ki khusnam sha ki samla pule ka long ban pynshlur bad ai mynsiem shuh shuh ïa ki samla ba kin nang leh bha ha ki jingpule ki jong ki.
Ha kane ka sngi u CP Marak, Chairperson ka Meghalaya Lokayukta u la long kum kongsan ha ryngkat ka jingdonlang ka Pearly Marak, Bah Rosanund Syiemlieh, Bah Marshal Lyngdoh, Tony Marak, Babu Bording Lyngdoh, ki kmie ki kpa, ki nonghikai bad ki khynnah skul.
Ha kane ka sngi la ïoh ban sam ïa ki khusnam da u kongsan u CP Marak sha ki samla pule ba pass bha bad kiba wan shakhmat ha ka eksam SSLC 20250 ki long ka Satilang Wahlang na ka skul Hynñiew Shnong Higher Secondary School kaba ïoh 89.66%, u Nelson Cooper Marbaniang na ka Little Star Higher Secondary School uba ïoh 89.16%, ka Medaaihun Marweiñ na ka Nativity Higher Secondary School kaba ïoh 89% bad kiwei kiwei.
La ïoh ban pynshit pynshngaiñ shuh-shuh ïa kane ka prokram ha kane ka sngi da ki jingrwai na u samla Jostar Jyrwa bad ki paralok bad ka jingshad tynrai na ka Ri Maram Folk Academy.
