Shillong, Naitung 06
Ka Mawtneng Upper Primary & Secondary School bad ka Nongjri Presbyterian HSS ki la long ar tylli ki skul na Ri-Bhoi lem bad ka North Liberty HSS na West Jaiñtia Hills ban mihkhmat ïa ka jylla Meghalaya sha ka International Subroto Mukherjee Football Cup 2025 ka ban sa long shen ha Bengaluru bad Delhi.
Kane ka la wan hadien ba ki la rah ïa ka nam lahduh ha la ki jong ki kyrdan ïalehkai ha ka State Level Subroto Mukherjee Cup Football Tournament 2025 ba la pynïaid da ka tnat ïalehkai jong ka Sorkar Jylla ha ka sngi Saitjaiñ.
Kane ka long ka sien kaba nyngkong eh ïa kitei ki kynhun kum ka Mawtneng bad ka North Liberty ba kin mihkhmat sha ka Jylla sha katei ka lympung ka ban sa long ha Bengaluru bad ha Delhi, katba ka Nongjri Presbyterian ka dei ka kynhun kaba la rah ïa ka nam lahduh ha ka Under-15 ki shynrang, hynrei mynta u snem yn mihkhmat da ka kynhun ïalehkai Under-17 ki kynthei.
Ha ka jingïakhun final jong ka Under-15 ki shynrang kaba la long ha SSA Stadium kaba ha Polo Shillong, ka Mawtneng ka la lah ban pynliem noh ïa ka Govt. Boys HSS na West Jaiñtia Hills lyngba ka tie-breaker da 5-3 kol.
Ha ka Under-17 ki kynthei, ka Nongjri Presbyterian ka la pynliem noh ïa ka Tyrsad HSS na East Khasi Hills da 2-1 kol. Kane ka nam jop ka la wan urlong lyngba ki kol na ka Paleimon Lyngdoh Lyngkhoi (19) bad ka Daphi Syngkli (54), katba ka Balabet Khongsit (16) ka la thep ïa ka Tyrsad.
Haba phai sha ka jingïakhun jong ka Under-17 ki shynrang, ka North Liberty ka la pynliem noh ïa ka Nongjri Presbyterian HSS na Ri-Bhoi da 1-0 kol. Kane ka la wan urlong lyngba u Lastborn Suting uba la thep ha ka minit kaba 84 jong ka extra time.
Ïa ka nam Best Goalkeeper ha ka Under-15 la ïohpdiang da u Arki Bauni Jalong na ka Mawtneng, katba ha ka Under-17 la ïoh da ka Rikyntiew Diengdoh na ka Nongjri Presbyterian SS bad u Namebanlam Nongkseh na ka Nongjri Presbyterian SS. Ïa ka nam Player of the Tournament la ïoh da u Pyntngen Nongtri na ka Mawtneng ha ka Under-15, katba ka Daphi Syngkli na ka Nongjri Presbyterian bad u Ïaisanlang Dohling n aka North Liberty ha ka Under-17 jong ki kynthei bad shynrang.
Ïa ki khusnam sha kine ki kynhun la sam da u President ka Meghalaya Football Association u Bah Hamletson Dohling, kumjuh u Working President ka Meghalaya State Olympics Association u Bah John F Kharshiing, u MLA ka Mawhati constituency u Bah Charles Marngar lem bad ki ophisar ka tnat ïalehkai bad kiwei.
