Shillong, Naitung 07
Ka lympung ïalehkai 4th Division Under-20 Football League 2025 ba la pynïaid da ka Shillong Sports Association (SSA) ka la bteng biang ha ka Lah Sngi U Blei ha kaba ka Them Rangskhen ACC bad ka Lummawbah SC ki la ïoh jingjop.
Ha kane ka jingïakhun kaba la long ha SSA Stadium kaba ha First Ground Polo, ka Them Rangskhen ka la pynliem noh ïa ka Nongkolew SC da 5-1 kol na ka bynta ban bteng lamkhmat ha ka Group-B.
U Elban Kurbah u la thep ar kol ha ka minit kaba 39 & 48, katba ïa kiwei pat la pynbud da u Neban Janong (3), Gilbert Kurbah (40+3) bad u Peristar Kharphuli (80+3). Hynrei ka Nongkolew ka la pynphai shi kol lyngba u Pynshailang Ryntathiang (9).
Da kane ka nam jop ka Them Rangskhen ka la ïoh 10 point na ki saw sien ïakhun bad ka la ïoh ban lamkhmat na katei ka group, katba ka Nongkolew ka dang ïai sah sha trai bad 1 point.
Ha kawei ka jingïakhun jong kane kajuh hi ka group kaba la long kham ha shwa, ka Lummawbah SC ka la pynliem noh ïa ka Mawlyngngad SC lyngba ka shi kol ba la thep da u Tyngshaiñlang Kharmawlong ha ka minit kaba 40.
Lyngba kane ka nam jop ka Lummawbah ka la jam sha ka kyrdan ba-ar ryngkat 7 point na ki lai sien ïakhun, katba ka Mawlyngngad ka la hiar sha kaba saw ryngkat 4 point.
Ha kawei pat ka jingïakhun jong ka Group-F hapdeng ka Lawei SC bad ka Lumpyngngad SC ki la ïasam mar shi point hadien ba ki la ïakhaid mad 1-1 kol. Na ka Lawei la thep da u Rishailang Mamar ha ka minit kaba 10, hynrei hadien 9 minit ka Lumpyngngad ka la lah ban pynphai kylla lyngba u Donlang Kharsyiemïong na ka bynta ban ïakhaid mar shi kol.
Lyngba kane ka jingïakhaid ka Lumpyngngad ka dang sah ha ka kyrdan ba-ar bad 5 point na ki lai sien ïakhun, bad duna sa 2 point ïa ka Mawlynrei kaba dang lamkhmat ha kane ka group, katba ka Lawei ka dang sah ha ka kyrdan sha trai bad 1 point.
Ka jingïalehkai ha ka Sngi Ba-ar kan long hapdeng ka Mawkasiang SC pyrshah ïa ka Nongthymmai R Nongkynrih SC ha ka por 10:30 mynstep, kumjuh ka Lapalang SC ïa ka Summit FA por 1:30 mynsngi bad ka Mawphlang SC ïa ka Umsohsun SC ha ka por 4 baje nohphai sngi.
