Shillong, Naitung 07
Ha kawei ka jingjia shah thombor kaba la jia ha kawei ka shnong kaba don ha East Khasi Hills ka la paw pyrthei hadien ba ka kmie jong ka khynnah kaba dang 15 snem ka rta ka la mih shakhmat ban dawa na ki bor jong ka aiñ ban pynshitom da kaba tyngeh ïa u kpanah uba donkti ban batbor ïa ka khun jong katei ka longkmie.
Haba ïoh ban ïakren bad ka kmie jong kane ka khynnah kaba ngat ha kane ka apot, ka la ïathuh ba kane ka jingjia ka la paw pyrthei hadien ba kum ka kmie ka la ithuh ba ka khun jong ka, ka la leh pher bha namarba kum -ba ka ju long, kane ka khynnah ka dei kaba shait khlaiñ hynrei kynsan ka la ipher ha ka jinglong jong ka.
“Ka khun jong nga, ka la shah batbor ha u kpanah haduh ba ngam tip. Nga shait kylli ïa ka hynrei ka ju ong ba kam don eiei tad haduh ba ki briew ki ïohi ba ka don jingpher ha ka jinglong jong ka,” ong ka kmie jong katei ka khynnah.
Kumta, na ka liang ka kmie jong katei ka khynnah ka la ïalam noh ïa la ka khun ban leit shim dawai na Sub-Centre hynrei dei tad haduh ynda la leh ïa ka Medical Check-up, ka la paw ba katei ka khun ka la armet bad ka dei ha katei ka por ba ka khun jong ka, ka la ïathuh ba ka la shah thombor ha u kpanah bad ong ba utei u kpanah u la byrngem-byrsit ïa ka ba kam bit satia ban ïathuh ïano-ïano ruh halor kane ka jingleh jong u bad na ka liang ka kmie ka la ong ba kam tip eiei halor kane ka jingshah thombor jong ka khun.
Shuh-shuh, ka kmie jong katei ka khynnah ka la ïathuh ba ka khun ka la armet bad ka la don 6 bnai eiei.
Na ka liang ka kmie jong katei ka khynnah ka la ong ba ka la ujor da ka ejahar pyrshah ïa utei u briew bad ka la kyrpad ruh ïa ki bor jong ka aiñ ba kin shimkhia lem halor kane bad ban pynsaja da kaba tyngeh ïa une u briew uba donkti ban thombor ïa ka khun jong ka.
“Kum ka kmie, nga kwah ba ki bor ka aiñ kin shimkhia ban pynsaja katkum ki kyndon ka aiñ pyrshah ïa kine ki briew kiba wan ban dusmon”, bynrap ka kmie jong katei ka khynnah.
