Shillong, Naitung 07
Ar tylli ki kynhun ïalehkai na ka nongbah, ka Shillong Lajong bad ka Rangdajied United ki la shah pynngat lang bad ka lahduh jong ka aïom ba la dep ka NorthEast United lem bad kawei ka kynhun shipai nabar ri ban don ha ka Group-E jong ka 134th Durand Cup 2025, kat kum ka jingpyllait ha ka Lah Sngi U Blei.
Kine ki jingïalehkai jong ka Group- E kin long ha Jawaharlal Nehru Stadium, Shillong bad la thmu ban sdang ha ka 26 tarik mynta u bnai.
Lah ban kdew ba ha u snem ba la dep, ka Lajong ka la lah ban ïalehkai bha ha katei ka lympung ha shwa ba kan shah rem noh ha ka semi final ha ka NorthEast United, kaba la rah ïa kane ka nam hadien ba ka la lah ban pynliem noh ïa ka lahduh jong ka Indian Super League ka Mohun Bagan, ha ka jingïakhun final kaba la long ha Kolkata.
Ka jingïoh rung ka Rangdajied sha ka Durand Cup ka dei ha ka khyllipmat kaba khatduh hadien ba ka Hyderabad FC ka la weng noh ïalade na katei ka jingïakhun.
Ïa kane ka lympung ïalehkai mynta u snem yn sdang ha ka 23 tarik mynta u bnai ha Kolkata da jingïakhun hapdeng ka East Bengal bad ka kynhun kaba na Bangalore ka South United FC.
Ha kane ka lympung ka ban neh haduh shi bnai, kin don haduh 43 tylli ki kynhun ban ïashim bynta ha kaba yn pynlong ha ki hynriew tylli ki nongbah bad ïa ka jingïakhun final yn pynlong ha ka 23 tarik u Nailar.
Ha kawei pa kawei ka group kin don hynriew tylli ki kynhun. Ki hynriew tylli ki kynhun ki ban wan ha ki kyrdan ba ha khlieh lem bad ar tylli kiba kynsai ki ban wan ha ki kyrdan ba-ar, kin ïoh rung sha ka quarter final ka ban long ha ka 16 bad 17 tarik u Nailar. Ïa ka semi final yn pynlong ha ka 19 bad 20 tarik u Nailar.
Ka Kolkata kan pynlong ïa ki ar tylli jingïalehkai jong ka Group- A bad B. Hadien ka jingïakhun nyngkong jong ka East Bengal, ka Indian Air Force bad ka kynhun ïalehkai I-League ka Namdhari FC kin ïakhun pyrshah ïa ka SUFC ha ka 27 tarik bad 30 tarik mynta u bnai.
Ha ka Group-B yn sdang naduh ka 28 tarik mynta u bnai, ha kaba ka Mohammedan SC kan ïakhun pyrshah ïa ka Diamond Harbor FC ha Kishore Bharati Krirangan. Nangta ka Kolkata Derby kan long hapdeng ka Mohun Bagan pyrshah ïa ka Mohammedan SC ha ka 31 tarik mynta u bnai ha kajuh ka madan. Ka Border Security Force (BSF) kan ïakhun nyngkong pyrshah ïa ka Diamond Harbor ha ka 1 tarik u Nailar.
Ka jingïakhun jong ka Group-C kan long ha Jamshedpur ha ka 24 tarik mynta u bnai ha kaba ka Jamshedpur FC kan ïakhun pyrshah ïa ka Tribhuvan Army FT na Nepal ha JRD Tata Sports Complex, katba ka Indian Army bad ka 1 Ladakh FC kin ïakhun nyngkong ha ka 29 tarik mynta u bnai bad 2 tarik u Nailar.
Ka Kokrajhar kan pdiang ïa ki jingïalehkai jong ka Group-D, kaba kynthup ïa ka Punjab FC, ka kynhun ïalehkai I-League 3 na Assam ka Karbi Anglong Morning Star FC, ka Bodoland FC bad ka Indo-Tibetan Border Police. Ka ITBP kan ïakhun pyrshah ïa ka Karbi Anglong ha ka 27 tarik mynta u bnai. Ka Bodoland FC kan ïakhun nyngkong ha ka 31 tarik mynta u bnai, katba ka Punjab FC kan ïakhun nyngkong ha ka 3 tarik u Nailar.
Ka Group-E kan long ha Shillong ha kaba ka Lajong kan ïakynduh nyngkong pyrshah ïa ka kynhun shipai nabar ri ha ka 26 tarik. Ka NorthEast United kaba dang pynkhreh ban bat biang ïa ka nam lahduh, kan sdang ïa ka jingïakhun ha ka 2 tarik u Nailar pyrshah ïa ka kynhun nabar ri. Katba ka Shillong Derby kan long hapdeng ka Lajong pyrshah ïa ka Rangdajied ha ka 29 tarik mynta u bnai.
Ha Imphal kaba ha Manipur, ka Khuman Lampak Main Stadium kan pynlong ïa ka jingïakhun kaba nyngkong jong ka Group-F ha ka 30 tarik hapdeng ka kynhun ïalehkai I-League 2 ka TRAU FC bad ka NEROCA FC. Ka Indian Navy bad ka Real Kashmir FC kin sdang ïa ka jingïakhun ba nyngkong ha ka 2 tarik u Nailar.
