Shillong, Naitung 07
Ka Meghalaya State Olympic Association (MSOA) ryngkat ka jingkyrshan lang bad ka tnat ïalehkai jong ka Sorkar Jylla, ka la pynkhreh ban pynlong biang ïa ka jingïakop mareh ba la tip kum ka 4th Sohra International Half Marathon 2025, kaba la thmu ban pynlong ha ka 27 tarik u Nailur mynta u snem ha Sohra.
Kane ka jingïakop mareh ka kynthup ïa ka 21K, 10K bad ka 5K ha kaba la khmih lynti ban wan ïashim bynta kumba 10 hajar ngut na kylleng jong ka ri, kumjuh kiba nabar ri lem bad na ka jylla Meghalaya.
Ka jingpynlong ïa kane ka jingïakop ka long ruh ha kajuh ka por ban kyntiew ïa ki kam jngohkai bad ruh ban pynïoh ïa ka met kaba koit bad khiah. Ha kane ka kynti la kyntiew ïa ka khusnam pisa na ka bynta ki nongjop ha baroh ki kyrdan jingïakop kaba long T.15.50 lak tyngka.
Haba ïakren bad ki nongthoh khubor ha ka Lah Sngi U Blei ha Shillong Press Club, u Working President ka MSOA, Bah John F Kharshiing, u la ong ba kane ka jingïakop kan long kumjuh kumba long ha u snem ba la lah bad la khmih lynti ba kin don haduh 10 hajar ngut ki nongïashim bynta. La kyntu ruh ïa baroh ki nongshim bynta ba ki dei ban wan ai jingtip shwa ka 10 tarik u Nailur mynta u snem.
Ha kawei pat ka liang, u General Secretary Bah Finely Lad Pariat, u la pynpaw ba mynta u snem yn sdang noh dang kham step khnang ba kan ym ktah ïa ki nongshim bynta. “Kumba ngi la sakhi ïa ka jingshit kyrang jong ka sngi ha u snem ba la lah ha kaba kiba bun na ki nongmareh ki la kem pang ha lynti, te kumta ban lait na kane ka jingeh ngi la thmu ban sdang noh kham kloi ïa kane ka jingïakop ha ka por 5:30 mynstep bad baroh ki nongshim bynta kin mih noh na nongbah Shillong ha ka por 3 baje mynstep.”
“Mynta ka kynti ka jingpynlut na ka bynta kane ka marathon ka long T.2.97 klur ha kaba ka lynti naduh ka jingpynbiang ïa ki nongïarap (volunteer), ka jingpynbiang ïa ka bam, ka jingpynbiang ïa ki kali na ka bynta baroh ki nongshim bynta bad kiwei ki jingdonkam nalor ki khusnam sha baroh ki nongjop ha la ki jong kyrdan,” u la bynrap.
