Khliehriat, Naitung 07
Ka Tuber Shohshrieh SC bad Moolang SC ki la ïoh jingjop ha ka lympung ïalehkai 3rd Division League ba la pynïaid da ka East Jaiñtia Hills District Football Association (EJHDFA) ha ka Lah Sngi U Blei.
Ha kane ka jingïakhun kaba la long ha madan Artificial Turf Diengshynrum kaba ha Khliehriat, ka Tuber Shohshrieh SC ka la pynliem noh ïa ka Mookympat SCSC da 2-0 kol. Tang mar ïasdang ka jingïalehkai ka Tuber Shohshrieh ka la pynkhih jar nyngkong eh lyngba u Franklin Muruh ha ka minit kaba 5. Kane ka kynhun ka la thep biang ïa ka kol kaba ar shwa ban wai lyngba u Ribait Bang (80+1) na ka bynta ban jop shi syndon.
Ha kawei ka jingïalehkai ka Moolang SC ka la lah ban pynliem noh ïa ka Evergreen SC Ladwapung da 3-1 kol. Ïa kine kol la thep da u Chesterfield Rymbai ha ka minit kaba 16, kumjuh u Sohlang Dkhar (44) bad u Riping Dkhar (64). Ka Evergreen ka la lah ban pynphai kylla lyngba u Shatisfymi Lamo (13) bad u Tesmi Dkhar 80+4 shwa kan shah rem.
Haba phai sha ka jingïalehkai kaba la long kham shwa hapdeng ka Umlong SC bad ka Wahsarang SC ki la ïasam mar shi point hadien ba ki la ïakhaid mar 1-1 kol. Ïa ka kol jong ka Umlong la thep da u Esakiel Dkhar (46), katba na ka Wahsarang la ïarap pynthep da u rangïalehkai ka liang pyrshah u Heijuh Miki Bareh ha ka minit kaba 80+3.
Ka jingïalehkai ha ka Sngi Ba-ar kan long hapdeng ka Shymplong SCSC pyrshah ïa ka Suchen Lumiarain SC ha ka por 11 baje mynstep, kumjuh ka Pamraipaithlu SCSC ïa ka Teilang SCSC Lummyrli ha ka por 1 baje mynsngi bad ka Mynkre SC ïa ka Mookhep SCSC ha ka por 3 baje nohphai sngi.
