ïa ki surok la shna ban suk ha ka leit ka wan u khunbynriew. Kaei kaba ngi ïohi da ka jingwan jong ki surokbah kum ka Shillong Bypass, ka Four-lane bad kiwei, ka jingdon jong ki briew kiba pynkylla ïa ki surok kum ki jaka ban ïalehkai da ki kali bad ki arshaka wat la ki sngewthuh ba ïa ki surok ym shym la shna na ka bynta ki nongñiah ban tynneng ïa ki tyngshop ka phlim ‘Hollywood’ ba la ai kyrteng ‘Fast & Furious’ bad kaba bun ki bynta jong ka. Namar ka jingkhyllew, ki don ki nongñiah kali bad arshaka kiba pyni ïa kata ka jingnang ban ïaid pynkhun ne pynher ne ban rah ïa ki shaka shalor bad kumta ter-ter. Ha Meghalaya, ngim pat don jaka ban pynïalehkai da ki kali bad arshaka wat la ki don kiba tbit ha kane ka liang. Lehse kita kiba smat ban lehkai kumne, ki dei ban leit dawa na ka Sorkar u Conrad K Sangma bad na u Bah Prestone Tynsong, Myntri ka tnat shna surok, ban shna da ka surok kaba kyrpang na ka bynta jong ki khnang ba kin lah ban leh katba ki mon khlem da pynthut ïa kiwei pat ki nongleit-nongwan.
Ngi la sakhi ba ha ka janmiet jong ka Sngi U Blei, kawei ka kali Espresso kaba la pynher sted da u nongñiah uba la don hapdeng ka jingshoh khawiang, ka la wanrah ïa ka jingjia tyngkhuh kali hynrei donbok pat ba ha kane ka jingjia, ka la don tang ka jingjulor jong ki kali bad ruh ka jingmynsaw malu-mala jong ki briew ba ïatyngkhuh. Ha kane ka jingjia kaba la jia ha Lad Nehru Park, katei ka kali, ka la tynrah ïa ka kali kaba shong u MLA ka North Shillong bad kumjuh ïa kawei pat ka kali. Ngi tip ba ha kane ka surok, ki kali kiba kiew bad hiar ki bun bha, kumta ngi hap ban phikir haba ñiah ïa ki kali. Hynrei ngim tip pat, ki jingpyrkhat aïu ki don ha kito ki nongñiah kiba pynher sted. Hato ka dei ba ki kwah ban khyllew namar kat ma ki te ym don shuh ba nud pynher kali bad khlem jingsalia wat lada jia eiei ruh?
Ym dei tang ki kali rit bad arshaka kiba kwah ban khyllew ha ki surok. Ngi sakhi wat ki nongñiah trok ruh ki long kumjuh. Khamtam ki trok thylli bad ki trok kit umphniang kiba wan phai thylli, ki ïaleh beit ban pynher bad tam shakhmat ïa kiwei pat ki trok, khlem da peit mano ba wan na ka liang pyrshah. Kum kine kiei-kiei ki dei barabor ki daw jong ka jingjur jong ki jingjia tyngkhuh kali kiba ju ïai jia khah-khah ha ki surokbah. Lehse ym baroh na kine ki jingjia ki dei namar ka jingleh khlemakor ki nongñiah tangba ngim artatien ba kham bun ki dei namar kata ka daw. Shisien ba la ïoh ñiah kali saw shaka lane arshaka, don kiba sngew ba kat ki te ym don shuh ha kane ka sla pyrthei bad tang ma ki kiba nang lane tang ma ki kiba don hok ban ïaid na kato ka surok. Ha surokbah pat, ki trok ki sngew ba ki dei kum ki syiem bad ki ïaid katba ki sngewbit. Dei hangta bunsien ki mih ki jingjia tyngkhuh kali kiba bun rukom. Kiba ngat ha ka apot na kawei ka liang, bunsien ki dei kiba lui-lui bad kiba ïaid la ka jong ka lynti.
Ka jingñiah lymmuh ïa ki kali bad arshaka bunsien ka ïalam sha ki jingjia ba sngewsih. Lada kita kiba ñiah thurmur ki mynsaw tang ïalade, kam da pher than namar i kumba ki ïa pan kwah hi. Hynrei kaba eh ka long ba ki pynmynsaw ïa kiwei kiba lui-lui bad kiba shu jia ryngkhat ba ki dei ban ïaid lynti na kato ka jaka. Bunsien kine kiba pyrshang laiphew jait laiphew skit ban lehkai da ki kali bad ki arshaka ki ju leit kham sha jngai na sor Shillong. Don bun kiba ngat ha ki jingmynsaw ruh bad ki pynthut shikatdei ïa ka leit ka wan jong kiwei pat. Ha Shillong, kiba kwah ban leh khyllah da ki kali bad arshaka ki kham mih ha ka por mynmiet ynda la kynjah ka shnong ka thaw. Tangba lada dei ha sor ne shawei, ki surok ki dei na ka bynta ban ïaid ban ïeng ki kali ha ka rukom kaba dei bad ka bym ktah ïano-ïano. Ki surok kim dei ban kylla long ki madan ïalehkai namar ïa kiba kum kita ki surok, ki don da kiwei watla ha Meghalaya kim pat shna satia.
Ka dei ruh ka kamram jong ki pulit ban pahara ha ki surok bad ki lynti ki syngkieñ kiba ki nongñiah ki kham juh ban ïalehkai da ki kali/arshaka. Dei ban kem beit ïa ki bad set along khnang ba kan long kum ka jingsneng na ka bynta kiwei bad khamtam eh ban pyllait na ki jingjia kiba sngewsih. Ka jingïada ka kham kordor bad kham kongsan ban ïa ka jingpynkhiah. Nangne shakhmat, ki nongshong shnong ruh ki dei ban sei la ki jong ki ‘Mobile Phone’ bad ban ring da ki durkhih ïa kito kiba ñiah kali thurmur bad ban pyntip sha ki pulit. Dei ban ring ha kata ka rukom ba yn lah ithuh ïa ki nombor jong ki kali/arshaka.
