Shillong, Naitung 07
U Myntri ba khmih ïa ka tnat Kam Jngohkai, Bah Paul Lyngdoh, u la pynpaw ka jingkyrmen kaba skhem ba hapoh ka 22 tarik mynta u bnai, yn sa lah ban pynkynriah noh ïa baroh ki nongdie madan ha Khyndailad sha ki jaka ba la ithuh da ka Sorkar.
U Bah Paul uba dei ruh u Nongaiktien jong ka Sorkar Jylla u la ong ka ïingbishar Meghalaya High Court ka la pynskhem ïa ka jingthmu jong ka Sorkar ban pynkynriah ïa ki nongdie jingdie madan na ki surok Khyndailad sha ki jaka ba la ithuh da ka Sorkar.
Haba kren sha ki lad pathai khubor ha ka Lah Sngi U Blei, u Bah Paul u la pynpaw ïa ka jingsngewskhem ban ïohi ba ki nongshong die madan kin bud ryntih ïa ki jingbthah, haba kdew ïa ka jingbiang ki bor ban pyntreikam ïa ka hukum bad ka jingkhlaiñ jong ka mukotduma hadien ba pynmih hukum da ka ïingbishar Meghalaya High Court.
U Bah Paul u la kam ba ka tnat Shillong Municipal Board (SMB) ka la biang pura ki nongtrei ban pynthikna ba ka jingpynkynriah ïa ki nongdie madan na Khyndailad kan ïaid beit ïaid ryntih. U la ong ba ha ka 22 tarik Naitung ka Sorkar ka kyrmen ba baroh ki nongdie madan kin kohnguh ïa ka jingbthah ka Sorkar ban kynriah noh sha ki jaka ba la pynkhreh ban bteng ïa ki kam khaïi ki jong ki.
U Bah Paul u la pyntip ruh halor ki jingthmu ka Sorkar ban pynlong ïa ka Khyndailad kum ka jaka ïaid kjat ki briew, kynthup ïa ka bynta na Khyndailad sha Jail Road bad Umsohsun ryngkat ka jingpynitynnad ïa ka jaka.
“Hadien ba la pynkynriah lut ïa baroh ki nongdie madan na ki surok Khyndailad, ka Sorkar kan pynitynnad bad kan pynbna ïa kane ka thaiñ kum ka jaka ïaid kjat (Pedestrian Zone) bad tang kito kiba sah ha kato ka thaiñ kin ïoh ban ïaid kali kata ruh ïa ka por yn sa pynbeit hadien,” la ong u Bah Paul.
Haba kylli, u Bah Paul u la ong, “Ka MUDA ka la don. Baroh kiei-kiei ki la don lut. Kane ka dei ka bynta ba nyngkong. Shisien ba ka seisoh ha bynta ba nyngkong, ngin sa nang pynïaid pat ïa ki bynta kiba sah”.
Ki nongshong dukan madan kiba mynjur ban pynkynriah ïa ki dukan kin ïoh ïa ka song pisa T.20,000 kynthup ïa ka jingsiew lypa kaba T.10,000 bad ka jingsiew kaba T.2000 manla u bnai na ka bynta san bnai.
U Myntri u la ban jur ba ka Sorkar Jylla ka la ailad bha ïa baroh bad ka la aipor ïa ki nongshong dukan die madan la palat shisnem ba kin pynkynriah ïa ki dukan.
“Ngi la leh kham bun ban ïa kaba kano-kano ka Sorkar kan leh. Ngi la ïaid lait ïa ka lynti ïaid, kynshew ha ka jaka ba lait bad aipor ïa ki la palat shisnem ba kin pynkynriah ïa ki dukan. Ngi la leh hok bha,” u la ong.
