Shillong, Naitung 07
Ka Sorkar Jylla ha ka Lah Sngi U Blei ka la pan jingïarap na ka National Human Rights Commi-ssion (NHRC) ka Sorkar India na ka bynta ban pynkhlaiñ shuh-shuh ïa ka jingïakhun pyrshah ïa ka jingjyllei jong u drok.
Ïa ki jingïarap ka Sorkar Meghalaya ka la pynsngew ha ka jingïa-lang kaba la pynlong ha ka Lah Sngi U Blei hapdeng u Special Monitor ka NHRC u Rakesh Asthana ha ka jingdon lang u Symbud Myntri Rangbah ka Jylla Bah Prestone Tynsong, u Myntri ka tnat Social Welfare Bah Paul Lyngdoh lem bad ki heh ka Sorkar Jylla.
Lah ban kdew hangne ba u Rakesh Asthana u la wan ïuhkjat ban pynlut por haduh lai sngi ha Meghalaya ban peit thuh bad lum jingtip halor ki kam khaïi drok hapoh ka Jylla.
Haba kren sha ki lad pathai khubor hadien ka jingïalang, u Myntri ka tnat Social Welfare, Bah Paul Lyngdoh, u la ong ba ha ka jingïalang ka Sorkar Meghalaya ka la pan jingïarap na ka NHRC ban wanrah ïa ka ophis Sub-Zonal jong ka Narcotics Control Bureau (NCB) ha nongbah Shillong.
U Bah Paul u la ïathuh ruh ba ka Sorkar Meghalaya ka la kyrpad na ka NHRC ban pynkloi ka mang pisa na bynta ban thied 2 tylli ki kali Scanner ban eksamin drok na ki kali ba wan rung shapoh ka Jylla.
“Ha ka jingïalang kaba ngi la shong, ngi la kyrpad ïa ka NHRC ban wanrah noh da ka ophis Sub-Zonal jong ka NCB ha nongbah Shillong bad ban pynkloi ban ïarap pisa ban thied 2 tylli ki kali Scanner namar ngi la ithuh 2 tylli ki jaka ha Ri-bhoi District ban pyntreikam ïa ki kali Scanner ban eksamin drok ïa ki kali ba rung sha Meghalaya,” la ong u Bah Paul.
U Myntri u la ïathuh ba na ka liang u Rakesh Asthana u la ïaroh ïa ki sienjam ba ka Sorkar Meghalaya ka la shim ban ïakhun pyrshah ïa u drok khamtam haba ïadei bad ka projek DREAM kaba ïasnohkti lang bad baroh ban pynduhjait ïa u drok na Meghalaya.
“Ka Meghalaya ka dei katto-katne na ki Jylla hapoh ka Ri kiba la shim ïa ka lynti ban pynïadon bynta ïa ka imlang-sahlang ha ka jingïakhun pyrshah ïa u drok,” ong u Bah Paul haba bynrap “Ka NHRC ka la kular ïa ngi ban ai ka jingïatreilang bad ka jingkyrshan kaba pura.”
Shuh shuh u la ïathuh ba ha ka jingïalang, ki heh ka Sorkar ki la kren halor ki jingma ba ap ïa ka Meghalaya na ka jingïajan jong ka Jylla ïa ka Golden Triangle-kawei na ki thaiñ pynmih drok ba bun eh ha ka thaiñ haba pynpaw ba ki lynti wanrah drok na Myanmar ki la buh ïa ka Jylla ha ka jingma ha ki kam khaïi drok.
U Myntri u la kren ruh halor ka jingdonkam ïa ki aiñ kiba kham khlaiñ, haba kyrpad ïa ka Sorkar Pdeng ban pynïar ïa ka jingset along hapoh ka PIT NDPS Act sha ka lai snem, ka sienjam ban tehlakam ïa ki nongkhaïi drok ba la kem bunsien. Ïa mynta, saw ngut ki briew ki la ngat hapoh ka PIT NDPS, katba 12 ngut ki dang don hapdeng ka jingbishar.
