Shillong, Naitung 07
U Myntri Rangbah ka Jylla, Conrad K. Sangma ha ka Lah Sngi U Blei u la kyntu ïa ka ’16th Finance Commission’ ban ai jingmut na bynta ka jingpynkiew kaba 25% ha ka bhah khajna na bynta ki Jylla kiba kham rit jong ka Thaiñ Shatei Lam Mihngi.
U Sangma u la pynsngew ïa kane ha ka jingïalang ïamir jingmut kaba la long hapdeng ka kynhun jong 4 tylli ki Jylla ba kham rit ka Thaiñ Shatei Lam Mih-ngi bad u Chairman lem bad ki dkhot ka ’16th Finance Commission’ ha New Delhi.
Kane ka kynhun kaba kynthup ïa u Myntri Rangbah ka Meghalaya, Conrad K. Sangma, Myntri Rangbah ka Mizoram, u P. Lalduhoma, Myntri ka tnad pla tyngka ka Tripura, u Pranajit Singha Roy, lem bad ki ophisar ka Sorkar Sikkim ka la pynpaw ka jingsngewnguh ïa u Chairman, Dr. Arvind Panagariya, lem bad ki dkhot ka komishon kiba la ailad ïa ki Jylla ba kham rit (jong ka thaiñ) ban pynpaw ïa ki jingeh bad ki jingthmu ba kongsan jong ka thaiñ.
“Ki jingai jingmut ka komishon halor ka bhah jong ki khajna ka Sorkar Pdeng ba la mang sha ki Jylla na bynta san snem ki long kiba kongsan haba ïadei bad ka jingkiew ha ka ïoh ka kot jong ki Jylla, khamtam eh na bynta ki Jylla kiba kham rit jong ka thaiñ, kiba ïakynduh jingeh ha ki jingdonkam,” ong ka kyrwoh na u Commissioner & Secretary ka tnad pla tyngka ka Sorkar Jylla.
Na ka liang u Myntri Rangbah ka Jylla, u la pynpaw ba ka jingkiew kaba 20% ha ka bhah khajna na ka ’14th Finance Commission’ sha ka ’15th Finance Commission’ ka la sakhi ïa ka jingkiew kaba 100% ha ka jingpynlut pisa jong ki Jylla.
“Kane ka mang tyngka ba la pynkiew ka la wanrah ïa ki jingpynbha kiba pyni dak ha ka koit ka khiah, ka jingkiew ha ka kam jngohkai pyrthei bad ka jingpynroi ïa ki jingtei kiba kongsan ha ki bynta bapher-bapher,” ong ka kyrwoh.
Kumjuh, u Myntri Rangbah ka Mizoram bad u Myntri tnad pla tyngka ka Tripura ki la ban jur halor ka jingroi ba mynta jong ka thaiñ bad ka jingdonkam ban pynneh ïa kane ka jingkiew.
“Ha kane ka jingïakren, u Myntri Rangbah ka Jylla Meghalaya u la kyrshan tyngeh ba ka ’16th Finance Commission’ kan ai jingmut ïa ka jingpynkiew ka bym duna ïa ka 25% ha ka bhah khajna na bynta ki Jylla kiba kham rit jong ka thaiñ haba ïadei bad ka por jong ka ’15th Finance Commission’ bad ka ‘Special Infrastructure Fund’ na ka bynta ki Jylla,” ong ka kyrwoh na une u heh ophisar ka Jylla.
Kane ka jingdawa ka la ïoh ïa ka jingkyrshan kaba ïa mynjur lang da baroh ki Jylla kiba la mihkhmat ha ka jingïalang.
Shuh shuh u Chairman lem bad ki dkhot ka ’16th Finance Commission’ ki la ai ka jubab kaba bha, da kaba pdiang ïa baroh ar – ki jingeh ba kyrpang bad ka jingkiew kaba paw ha ka ïoh ka kot kaba la kynjoh da ki Jylla kiba kham rit jong ka thaiñ ha ka por ba mynta jong ka komishon.
Nalor kane, ïa ka ‘Joint Memorandum’ kaba batai ïa ki jingsngewkhia bad ki jingangnud ba ïasam lang jong ki Jylla ba kham rit jong ka thaiñ, la aiti sha ka ’16th Finance Commission’.
Kane ka jingïalang kaba la pynïaid da ka tnad pla tyngka ka Meghalaya, ka la kut ha ryngkat ka jingkyrmen, ha kaba baroh ki nongïashim bynta ki la pynpaw ïa ka jingkyrmen skhem na bynta ki jingmih kiba bha – ki ban nang pynroi bad kyntiew shuh-shuh ïa ki Jylla kiba kham rit jong ka thaiñ.
