Shillong, Naitung 08
Ka Special Cell jong ki pulit ka East Khasi Hills District ka la kem noh ïa u Bah Stoning Kharphuli ha ka janmiet jong ka Lah Sngi U Blei, ka 07 tarik u Naitung 2025, halor ka jingkynnoh ba u la leh be-ijot ïa la ka khunruid kaba dang don ha ka rta 15 snem bad pun-khun mynta la 6 bnai.
Kane ka jingkem ïa u Bah Stoning Kharphuli ka dei hadien ba na ka liang ka kmie jong katei ka khynnah ka la ujor da ka ejahar pyrshah ïa u Bah Stoning sha ki pulit.
Ha ka jingïakren bad ki lad pathai khubor ha ka Sngi Ba-ar, ka 08 tarik u Naitung 2025, u Superintendent of Police (City), Bah Herbert Kharkongor, u la pyntip ba ka thanat Mawlai ka la ju pyrshang ban kem ïa u Bah Stoning, hynrei u la lait noh na ka jingshah kem.
Ki pulit ki la pynlong ruh ïa ka jingwad ïa u Bah Stoning Kharphuli ha ki jaka ba u sah bad ruh ha ka shnong trai jong u, bad ha ka janmiet jong ka Lah Sngi U Blei, ki pulit ki la ïoh kem noh ïa u na ki bynta jong ka Ri-Bhoi District.
U Bah Herbert u la ong ruh, ba ka kmie jong ka khun kynthei ka la ïoh jingtip shaphang ka jingpun-khun jong ka khun jong ka ha ka por ba ka leit sha ka Primary Health Centre (PHC) na bynta ka jingsumar.
“Ïa katei ka khynnah la phah sha Ganesh Das Maternal and Child Health Hospital ha ka 01 tarik u Naitung na bynta ka jingsumar kaba bniah. Hadien ba la shong ha ka jaka sumar la shiphew sngi, la pyllait noh ïa ka ha ka janmiet jong ka Lah Sngi U Blei,” ong u Bah Herbert Kharkongor.
Ki pulit ki la pynrung da ka mukotduma pyrshah ïa u Bah Stoning Kharphuli ha thanat Mawlai hapoh ki kyndon bapher-bapher jong ka Protection of Children from Sexual Offences (POCSO) Act, 2012 bad Section 351 (2) jong ka Bharatiya Nyaya Sanhita BNS 2023.
U Bah Herbert u la ong ruh ba ki pulit kin rah ïa u Bah Stoning sha ka ïingkashari ban pan ïa ka hukum na bynta ka jingtohkit kaba kham bniah.
