Ban khuid bad lait na ka jingsma ka basa, mih ryntih ki nongdie syiar ban pynkhuid

Kane ka jingpynkhuid ïa katei ka basa die syiar ka dei kum shi bynta ban wanrah ïa ka khuid ka suba ha shilynter jong katei ka ïew.

Shillong, Naitung 08

Ka kynhun ki nongdie syiar hapoh Ïewduh kaba la tip kum ka Basa Syiar Khlieh Ïewduh ha ka Sngi Ba-ar ka 08 tarik u Naitung 2025 ka la shim ïa ka sienjam ban sdang pynkhuid ïa ka basa die syiar ha Ïewduh.

Kane ka jingpynkhuid ïa katei ka basa die syiar ka dei kum shi bynta ban wanrah ïa ka khuid ka suba ha shilynter jong katei ka ïew.

Ha kane ka sngi la sakhi ïa ka jingïashim bynta da ki phew ngut ki nongdie doh syiar ha Ïewduh ha ryngkat ka jingïadonlang u Myntri ba dei peit ïa ka khuid ka suba hapoh Ïewduh u Bah K.Wankhar.

“Na ka jingïohi ïa ka jingjaboh ha ka ïew ka hat bad ka jingpyntuid ïa ki jaboh jabaiñ ha shilynter ka lynti ïaid kjat jong ki paidbah kaba buh ruh ka jingma ha ka koit ka khiah ïa ki paidbah, kumta ka kynhun ki nongdie syiar ha Ïewduh ki la shim ïa kane ka sienjam ban pynkhuid khnang ba kan long kaba itynnad ïa ka ïew bad ban lait na ka jingsma ruh kumjuh.”

Haba ïakren bad ki lad pathai khubor, na ka liang u President ka kynhun, Bah Korbarsingh Rani, u la ong ba ka jingpynkhuid ïa ka basa ka dei namar ba ki kwah ban ïohi ïa ka khuid ka suba ha ïew khnang ban lait na ka jingsma eiei.

Shuh shuh u la kyrpad ïa kiwei de ki basa kiba don hapoh ïew, la ka long ki basa jhur, ki basa doh bad kiwei-kiwei de ki basa ba kin mih shakhmat ban pynkhuid lem ban wanrah ïa ka khuid ka suba bad ban lait na ki jingsma, khamtam mynta ka dei ka por lyiur ki jaboh ki tuid bha.

U la ïathuh ruh ba ïa kane ka jingpynkhuid ïa ka basa die syiar, kin leh beit tang shisien lai bnai khnang kan ym ktah ïa ka kamai-kajih jong ki.

U la kyntu ruh ïa ki paidbah kiba shong ha kane ka ïew jong u Syiem ba kin sngewbha ban da leh khuid leh suba ïa ka ïew ba kan pynitynnad khnang ba ki paidbah kiba mih bad rung ruh kin sngewtynnad bad sngewkhuid haba wan shapoh ïew.

Na ka liang u Myntri pat u la pynpaw ka jingsngewkmen ïa ka jingïatylli ki nongdie syiar hapoh ïew kiba la mih shakhmat ban pynkhuid ïa la ka basa, nalor kata u la kyntu ruh ba kin nang ïai bteng ïa kane ka kam.

U la ong ba kum ka hima hi ngi ju pynkhuid shisien ha ka shi snem, hynrei ka jingmih ryntih ki nongshong die basa syiar ha Ïewduh ban pynkhuid ïa la ka jong ka basa ka long kaba itynnad.