Shillong, Naitung 08
Hadien ka jingmih ka jingkynnoh ba uwei u samla ïa uba la tip kyrteng kum u Getwin Jyrwa, 19 snem ka rta na ka shnong Mawkisyiem kaba hap hapoh Sohra, u la shah shoh dusmon ha ki Pulit ka thanat Sohra ha ka 3 tarik u bnai Naitung, 2025, u Superintendent of Police (City), Bah Herbert Kharkongor, u la ong ba ha ka 1 tarik Naitung, ka thanat ha Sohra ka la ïohpdiang ïa ka jingujor na u Rangbah Shnong ka shnong Mawkisyiem ha kaba la kynnoh ba u Getwin Jyrwa, u la donkti ban byrngem-byrsit ïa uwei pat u briew uba la tip kyrteng kum u Jop Majaw na katei hi kajuh ka thaiñ.
Haba kren sha ki lad pathai khubor ban ai jingpynshai halor kane ka jingjia, u Bah Kharkongor u la ong ba katkum katei ka jingujor da ka Dorbar Shnong, u Getwin u la donkti ruh ban pynkulmar hapoh shnong bad ban pyndonkam da ki ‘tien sih ‘tien sang kiba har rukom.
Na ka liang ka shnong, ka la khot ïa u Getwin sha Ïingdorbar ha ka 28 tarik Jylliew hynrei utei u samla u khlem wan mih satia sha ka Dorbar Shnong bad ka dei ha ka 1 tarik Naitung ba la mudui noh da ka ejahar pyrshah ïa une u samla.
U Bah Kharkongor u la ïathuh ruh ba ki bor Pulit ki la thmu ban leit kem ïa utei u samla na ka ïingsah jong u hynrei um shym la don ha ïing bad u la phet. Pynban na ka liang ka kmie jong une u samla ka la wan ban aiti hi noh dalade ïa une u samla sha thanat ha ka 3 tarik Naitung hadien ba ka la ïoh jingtip ba ki Pulit ki la wan wad ïa u khun jong ka.
Shuh-shuh, na ka liang u SP u la ïathuh ba la thung da u Sub-Divisional Police Officer (SDPO) jong ka Pynursla ban tohkit halor ka jingkynnoh ba la shoh bad bom ïa une u samla ha thanat da ki Pulit, bad ïa ka kaiphod yn sa hap ban aiti hapoh kine ki khyndiat sngi ha kaba ka tnat kan sa shim ïa ki sienjam halor kumno ban leh katkum ka jinglap ha ka jingtohkit.
“Ha kaba ïadei bad kane ka jingjia, u SP u la pynmih ïa ka hukum ban thung ïa u SDPO ka Pynursla ban tohkit halor kane ka jingkynnoh bad ban aiti ïa ka kaiphod ha kane ka taïew. Kumba ka dei ban long katkum ka kaiphod, ngin sa shim ïa ki sienjam kiba donkam,” ong u Bah Kharkongor.
