Nongstoiñ, Naitung 08
Katto-katne bnai ba la shah khang, ka karkhana MS Shree Shakhambari Ferro Alloy Ltd kaba don hapoh ka shnong Rwiang, ka la ïoh biang ïa ka jingmynjur ne ka Consent to Operate na ka Meghalaya State Pollu-tion Control Board ba kan treikam biang.
Ïa kane la pyntikna da u Deputy Commissioner ka West Khasi Hills District u Bah Garod LSN Dykes haba kren sha ki nongthoh khubor ha ka Sngi Ba-ar jong ka taïew.
U DC u la pynpaw da kaba ong ba “Ngi la ïoh pdiang ïa ka shithi na ka Meghalaya State Pollution Control Board ba ka la dep pynduh ïa ka ‘closing order’ bad mynshwa bad la dep ai ïa ka Consent To Operate ba katei ka karkhana kan lah ban treikam biang.
U la ong ba kine ki karkhana ki treikam halor ka Water Act bad Air Act bad ki expert kiba la pynkhamti ruh da ka aiñ ki dei na ka Meghalaya State Pollution Control Board bad u ngeit ba ka MSPCB ka la dei ban peit bniah ïa kine hashwa ban ai ïa ka hukum jong ka.
Shuh shuh haba kren pat halor ka jingktah ïa ka koit ka khiah ki nongshong shnong, u DC u la ong ba ym pat lah ban ong ba ka don ne kam don kum kata hynrei lada ka don kum kata ruh, ka shnong lyngba u Sordar ka lah ban wanrah da ka jingthoh ryngkat ki kyrteng jong kita kiba ïoh jingpang bad na ka liang jong ka ophis kan sa bthah ïa ka ophis jong ka DMHO ba kan leh ïa ki jingpeit bniah lane ban phah ïa ka health screening.
Nangta, haba kylli pat ba ka lah ban don ki jingshalan be-aiñ ïa ki mar ki mata ha katei ka jaka, u DC u la pynpaw da kaba ong, “Ngi don ïa ka District Task Force ba kynthup lang ïa ki pulit bad Magistrate kiba peitngor na ka por sha ka por ïa ki jaka kiba lah ban don ki kam kiba be-aiñ.”
