Kane ka rukom kheiñ khur kheiñ jait ha ngi ki Khasi ka long kaba la wan long naduh ki hajar snem mynshuwa. Ki jaitbynriew ha satlak ka pyrthei ki bun kiba ai jait kpa ki la roi kum u shyiap rud duriaw. Ka ai jait kmie ka long kum u syntiew (Oasis) ba mih hapdeng ka ri shyiap ba la ker tawiar da u shyiap. Te ban ong ka ai jait kmie ka kham khraw ban ïa ka ai jait kpa ka long tang ka nia shu thaw.
Kane ka ai jait ka shong ha ngi ki briew. Kam don ka sang ka ma kumba pyntieng kiba ïa shah liang wat lada ngi ai jait ha u kpa lane ka kmie ruh. Kumta ka shong ha ngi ban jied la ngi sngew dei ban ai jait sha u kpa ba ai ïa u symbai ne sha ka kmie ba pun ba kha. Ngi hap ban shim na baroh arliang ba ka jaitbynriew kan im kan roi kan kiew ha ka ioh ka kot ka khaïi ka pateng bad kumjuh ban pynneh pynsah ïa ka doh ka snam tynrai ka jaitbynriew.
Ngim kwah ba ka jaitbynriew kan duh jait lyngba u symbai ba ioh na ki kpa bym dei Khasi. Namar kam shongnia ba paw tang ka jait Khasi, katba ka snam (Blood relationship) ka dei na u symbai bym dei Khasi. Ngi kwah ba ka jaitbynriew Khasi kan sah kum ka jaitbynriew kaba nylla paka, khlem da ïa milai lang bad ki symbai ba ioh na ki bym dei Khasi.
Hato dei na kane ka daw ba sa mih ka tang jait ha ka jaitbynriew? Hato ka long soh ban tang jait tang ïa ki khun na ki kpa Khasi ka lok bym dei Khasi? ïa ki khun na u kpa bym dei Khasi bad ka kmie Khasi ruh dei ban tang jait khlem jingleh shiliang. Ne phi ong ka long sang ban tang ïa ki khun ba ioh na ki kpa bym dei Khasi? Ka jingai jait ïa ki khun shipiah ka long kumba ngat ha ka shongkhawiah, ïa ka tynrai ka jait Khasi – Khara baieid jongngi ki Khasi paka.
C. B. Iawphniaw
