Kat nang ïaid lynti na uwei u snem sha uwei pat, ngi sakhi ba ki kam sniew ruh ki la kynrei katta-katta na kawei ka sngi sha kawei pat. Ka jingkynrei jong ki kam sniew ha kiba bun ki liang naduh ka tuh ka thiem, ka kam pynïap briew, ka ïashoh-ïadat bad kiwei-kiwei ka la wanrah ïa ka jingbymshngaiñ shuh ha ka imlang-sahlang. Ki trai ïing ki trai kali arshaka ne saw shaka, ki trai dukan ne ka leit ka wan ruh kim shngaiñ shuh. Balei kine ki kam sniew ki la kynrei haduh katne-katne? Kaei ka daw kaba la pynlong ïa ki briew ban shlur bad pyrshang ban kamai da ka lynti kaba suk ne ban shu knieh jubor noh ïa ka umsyep jong kiwei pat kiba da pynshitom ïalade.
Ha kine ki bnai ba la leit bad ruh ki khyndiat sngi, ngi la sakhi ïa ki jingsniew kiba bun kum ka kam pynïapbriew, ka kam dung tari, kam lute. Ynnai ïakren ïa ki kam tuh kam thiem kiba ju jia manla ka sngi ha ki dong bad ki shnong bapher-bapher. Hato ka jingkynrei jong ki kam sniew, ka dei namar ba synjor palat ka aiñ? Hato dei ka jingkynrei palat jong ki jingdih pynbuaid kum u drok ne ka dei ka jingbym don por shuh jong ki kmie ki kpa ne ki bahaïing-bahasem ban sneng ban kraw ne ban pynlut por kham bun bad la ki khun ki kti. La ishyrkhei shisha kata ka jinglong-jingman, ym shngaiñ shuh ka leit ka wan khamtam lei ban ïaid marwei ha ki jaka kynjah. Ym shngaiñ shuh wat ban shong kali kamai ban leit pyndep ïa la ki kam ki jam. Ngi dang sakhi ba dang ha kine ki sngi, ka la don ka jingjia jong ka jingshah tuh ki sohshkor na ki shkor kawei ka samla, kaba la kiew kali kamai na Motphran ban leit sha Dhankheti.
Halor ka jingjyllei jong ki kam sniew, ka jingkylli ka mih ruh ba hato kata ka akor ka burom, ka jingpyrkhat para briew kam don shuh? Haduh katno ka jaidbynriew jong ngi ka la hiar. Haba peit ïa ki jingjia, ym da ïapher than shuh na kiei kiba jia sha ki jylla rithor. Haba peit ïa ka jinglong-jingman, kawei na ki daw jong ka jingjyllei ki kam sniew ka lah ban dei ruh na ki kor ki bor teknologi. Ngi ïohi ba ki rynsan social media ka dei kawei na ki rynsan kaba la ktah bha shibun ym tang ïa kiba la san la rangbah, hynrei ïa ki samla bad haduh ki khynnah khyllung. Ki jingsniew kiba bun ki don ha ka, kumta lada ym nang ban pyndonkam, ka ïalam bad pynngop sha ki jingsniew bapher-bapher.
Haba phai pat sha ki bor ka aiñ ne ki pulit, hooid la ïohi ba ki don ki pulit kiba trei shitom hynrei ym ju kham ïohsngew pat ba kin ïoh ban kem ïa kiba bun hynrei tang ïa ki katto-katne bad wat ki tiar ki tar kiba shah tuh ruh ym ju kham ïohi ba kin ïoh kurup biang. Bunsien ki la don ki jingjia shah tuh ha kaba ka durkhmat u nongtuh ka la paw ha ki kor CCTV hynrei ym ïoh pat ban kem. Hato dei kane kawei ka daw kaba pynshlur ïa ki briew ba don jingmut sniew ban ïaid shakhmat? Ka tnat pulit ka dei ban shimkhia halor kane, ban ïaleh khanglad kat lah kat ïai ïa kine ki kam sniew bad ban wanrah biang ïa kata ka jingsngewshngaiñ ha ki paidbah bad ka imlang-sahlang. Ka long ruh kaba donkam pat ïa ki paidbah, ki shnong ki thaw ba kin ïatreilang bad ka tnat pulit ban khanglad ïa kine ki kam sniew.
