Shillong, Naitung 08
Ka Meghalaya Swimming Association (MSA), ka la shim ïa kawei na ki sien jam da kaba ka la lum lang ïa ki kmie ki kpa bad kumjuh ki khynnah kiba ka la dep jied lypa ba kin sdang noh ïa ka jingpynkhreh kum shi bynta ban mihkhmat ïa ka Jylla sha ka 39th National Games 2027 ka ban long ha Meghalaya.
Kat kum ka jingïoh lum jingtip ha ka thup pyllait kyrteng ba nyngkong ki don kumba 14 ngut ki shynrang bad 8 ngut ki khynnah kynthei, kiba ïa mynta la ibit ïa ki ban pynrung sha kane ka thup, ïa kaba ka MSA ka la khmih lynti ba kin nangkiew shaphrang ha kane ka jingïalehkai.
Haba pynbna ïa ki kyrteng jong ki, ka MSA ha kane ka jingïalang ka kyntu ïa ki kmie ki kpa ba ma ki ruh ki donkam ban ai lem ka jingkyrshan kaba radbah ïa la ki khun, kum shi bynta ba kin lah lem ban kynjoh sha ka thong.
Nalor katta, ka MSA ka la ai ruh ïa la ka jong ka jingmaitphang ba da kumno yn hap ban long kiba la pynkhreh, ïa kaba ka jingkhmih kaba bniah kan long ruh wat naduh ki coach, ka jinglah ban ïalehkai, ka discipline bad kiwei kiwei.
Ïa kane ka jingïalang la lah ban pynkut da ka jingïakren bad ïa syllok iwei-pa-iwei u/ka khynnah bad ki kmie ki kpa, ha kaba la ïoh ïa ka lad ban da pynshai bin pa bin, ne ban weng ruh ïa kano kano ka jingbym lah ban sngewthuh, nalor katta la ïoh ruh ban batai bniah ïa ki, ba da kumno ban nang ban mang ne bynta ïa la ka jong ka por kum ha ka ban pule ïa ka kot ban bad kilan ïa la ka met, shwa ban kynjoh ïa ka thong ban ïoh mihkhmat ïa ka Jylla sha ka National Games 2027.
Na ka liang ka MSA, ka la shim ruh ïa kane ka kabu ban ai khublei ïa ka sorkar jylla, kaba plie lad ïa ka synjuk ba kan ïoh ïa kane ka kabu ban sdang pynkhreh janai ïa la ka jong ka kynhun, da kaba ai ruh ïa ka song ïarap pisa, kaba long kawei na ki kam kiba kane ka jingïarap kan nym kut tang na ka bynta ka jingpynkhreh ïa ka National Games, hynrei kan ïarap ruh at ban lah ban sei ïa ki rang ne ki ‘thei samla ki ban kynjoh sha ka thong ban mihkhmat wat ha ki rynsan ïakop ba long ha ka ri bad wat shabar ri ruh kumjuh.
